លោក Juan Carlos Pino ដែលជាជាងជួសជុលរថយន្តគុយបាមួយរូបដែលរៀនបានត្រឹមថ្នាក់ទី ៨នោះ អាចរកឃើញវិធីសាស្រ្ត យកឈ្នះការបិទផ្លូវប្រេងរបស់សហរដ្ឋអាមេរិក ។

ការប្រើប្រាស់ភាពប៉ិនប្រសប់របស់គុយបាដែលបានអភិវឌ្ឍឡើង បន្ទាប់ពីទណ្ឌកម្មរបស់សហរដ្ឋអាមេរិកអស់ជាច្រើនទសវត្សរ៍ លោក Pino វ័យ ៥៦ឆ្នាំ បានប្តូររថយន្ត Fiat Polski ផលិតនៅប៉ូឡូញឆ្នាំ ១៩៨០ មកដើរដោយថាមពលធ្យូងអុស ដែលជាឥន្ធនៈថោក និងសម្បូរជាងសាំង ចាប់តាំងពីទីក្រុងវ៉ាស៊ីនតោនកាត់ផ្តាច់ការដឹកជញ្ជូនប្រេងទៅកាន់ប្រទេសកោះនៅតំបន់ការ៉ាអ៊ីបមួយនេះ កាលពីខែមករា ។

លោក Pino បានកែឆ្នៃរថយន្តពីរោងជាងរបស់លោក ស្ថិតក្នុងទីក្រុង Aguacate ដែលមានមនុស្សរស់នៅ ៥ពាន់នាក់ប៉ុណ្ណោះ និងមានចម្ងាយប្រហែល ៧០គ.មភាគខាងកើតទីក្រុងឡាហាវ៉ាន់ ។

សព្វថ្ងៃ ទីក្រុង Aguacate ហ៊ុមព័ទ្ធដោយវាលស្មៅ និងកន្លែងយកថ្ម ជាទីដែលមនុស្សទៅធ្វើការកាន់រណានៅលើស្មារបស់ពួកគេ ។ នៅក្នុងទីក្រុងមួយនេះ លោក Pino ល្បីជាងគេ ដោយសារលោកមានរថយន្ត Polski បើកបរតាមដងផ្លូវមានជង្ហក់ ជាមួយធុងប្រេងចំណុះ ៦០លីត្រដាក់នៅក្រោយរថយន្ត ។

លោក Pino បានផលិតរថយន្តដើរដោយថាមពលធ្យូងអុសរបស់លោកពីវត្ថុកែឆ្នៃ និងវត្ថុដែលគេបោះចោល ។ ធ្យូងអុស បានដុតនៅក្នុងធុងបំប្លែងប្រូផេនដែលបិទជិត ជាមួយនឹងគម្របត្រង់ស្មម៉ាទ័រ ។ 

ក្នុងនាមជាប្រទេសសេដ្ឋកិច្ចឡោមព័ទ្ធដោយសហរដ្ឋអាមេរិក ភាពក្រក្សត់ កើតមានឥតឈប់ឈរនៅក្នុងប្រទេសគុយបា ។ ស្ថានភាពមួយនេះកាន់តែអាក្រក់ទៅ ចាប់តាំងពីសហរដ្ឋអាមេរិក ទម្លាក់អំណាចប្រធានាធិបតីវេណេស៊ុយអេឡាលោក Nicolas Maduro ដោយកាត់ផ្តាច់ប្រេងវេណេស៊ុយអេឡា ខណៈគំរាមដាក់ទណ្ឌកម្មលើប្រទេសណាដែលហ៊ានផ្តល់ប្រេងដល់គុយបា ៕