ប្រេសិតប្រធានាធិបតីសហរដ្ឋអាមេរិកលោក John Coale បានជួបជាមួយប្រធានាធិបតីបេឡារុសលោក Alexander Lukashenko នាថ្ងៃព្រហស្បតិ៍នេះ អំឡុងបេសកកម្មចុងក្រោយរបស់លោក ក្នុងការព្យាយាមចរចាលការដោះលែងអ្នកទោសនយោបាយ ។

លោក Coale ជាប់ការងារប្រគល់ជូនដោយលោកប្រធានាធិបតី Donald Trump ដើម្បីព្យាយាមដោះលែងអ្វីដែលក្រុមសិទ្ធិមនុស្សនិយាយថា ពលរដ្ឋបេឡារុសជាង ១.១០០នាក់ បច្ចុប្បន្នកំពុងស្ថិតក្នុងមន្ទីរឃុំឃាំង ដោយសារសកម្មភាពនយោបាយ ឬសកម្មភាពសិទ្ធិមនុស្សរបស់ពួកគេ ។

កិច្ចពិភាក្សាលើកមុនរវាងលោក Coale និងលោក Lukashenko នាំឲ្យមានការដោះលែងអ្នកទោសនយោបាយរាប់សិបនាក់ កាលពីខែកញ្ញាឆ្នាំមុន ហើយនិងអ្នកទោសនយោបាយ ១២៣នាក់បន្ថែមទៀត កាលពីខែធ្នូរ ដែលរួមទាំងម្ចាស់ជ័យលាភីណូបែលសន្តិភាពលោក Ales Bialiatski និងអ្នកនយោបាយប្រឆាំងអ្នកស្រី Maria Kalesnikava និងលោក Viktar Babaryka ។

ជាការដោះដូរវិញ សហរដ្ឋអាមេរិកដកចេញទណ្ឌកម្មលើប៉ូតាស្យូមរបស់បេឡារុស ដែលជាគ្រឿងផ្សំដ៏សំខាន់មួយនៅក្នុងជីកសិកម្ម ហើយនិងពិភាក្សាលើលទ្ធភាពនៃការបើកស្ថានទូតសហរដ្ឋអាមេរិកឡើងវិញនៅក្នុងទីក្រុង Minsk ដែលបានបិទកាលពីឆ្នាំ ២០២២ ក្រោយប្រធានាធិបតីរុស្ស៊ីលោក Vladimir Putin ប្រើប្រាស់បេឡារុសជាជើងទម្រ សម្រាប់ការវាយលុកអ៊ុយក្រែន ៕