សារព័ត៌មានរដ្ឋ នៅថ្ងៃព្រហស្បតិ៍ (ទី១៩ ខែមីនា ឆ្នាំ២០២៦) នេះ បានរាយការណ៍ថា រដ្ឋមន្ត្រីការបរទេសអ៊ីរ៉ង់ បានអំពាវនាវឲ្យមានការប្រុងប្រយ័ត្ន និងការសម្របសម្រួលក្នុងតំបន់ អំឡុងពេលជជែកតាមទូរស័ព្ទដាច់ដោយឡែកពីគ្នា ជាមួយសមភាគី នៅក្នុងប្រទេសទួរគី អេហ្ស៊ីប និងប៉ាគីស្ថាន ខណៈដែលយោធាបានព្រមានអំពីការឆ្លើយតបដ៏ធ្ងន់ធ្ងរជាងមុន ចំពោះការវាយប្រហារបន្ថែមទៀតលើហេដ្ឋារចនាសម្ព័ន្ធថាមពលរបស់ខ្លួន។

បន្ទាប់ពីរោងចក្រថាមពលរបស់ខ្លួន នៅទីតាំងឧស្ម័ន South Pars និង Asaluyeh ត្រូវបានកំណត់គោលដៅ កាលពីថ្ងៃពុធ អ៊ីរ៉ង់បានសងសឹកប្រឆាំងនឹងអ្វីដែលខ្លួនចាត់ទុកថា ជាទីតាំងថាមពលដែលមានទំនាក់ទំនងជាមួយសហរដ្ឋអាមេរិក នៅក្នុងប្រទេសឈូងសមុទ្រ ក្នុងនោះរួមមានទាំងទីក្រុងឧស្សាហកម្ម Ras Laffan ក្នុងប្រទេសកាតា ដែលជាទីតាំងតំបន់ LNG (ឧស្ម័នធម្មជាតិរាវ) ដ៏ធំបំផុតរបស់ពិភពលោក។

ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃព្រហស្បតិ៍នេះថា៖ «នៅក្នុងការអំពាវនាវទៅកាន់សមភាគីបរទេស លោក Araqchi បានវាយតម្លៃការវាយប្រហាររបស់សហរដ្ឋអាមេរិក និងអ៊ីស្រាអែល លើហេដ្ឋារចនាសម្ព័ន្ធអ៊ីរ៉ង់ថា ជាវិធានការមួយដែលមានគោលបំណងបង្កើនភាពតានតឹង និងធ្វើឲ្យតំបន់មានអស្ថិរភាព ហើយបានជំរុញឲ្យមានភាពប្រុងប្រយ័ត្ន និងការសម្របសម្រួល ក្នុងចំណោមប្រទេសក្នុងតំបន់ដើម្បីឆ្លើយតបទៅនឹងការគំរាមកំហែងទាំងនេះ»។

អ្នកនាំពាក្យម្នាក់នៃទីបញ្ជាការរួបរួមកងកម្លាំងប្រដាប់អាវុធអ៊ីរ៉ង់ បាននិយាយថា ការវាយប្រហារថ្មី លើហេដ្ឋារចនាសម្ព័ន្ធថាមពលរបស់ប្រទេស បាននាំឲ្យមាន «ដំណាក់កាលថ្មីក្នុងសង្គ្រាម» ដែលអ៊ីរ៉ង់បានកំណត់គោលដៅលើកន្លែងផលិតថាមពលដែលមានទំនាក់ទំនងជាមួយសហរដ្ឋអាមេរិក និងវិនិយោគិនអាមេរិកក្នុងតំបន់៕