ប្រព័ន្ធផ្សព្វផ្សាយក្នុងស្រុក បានរាយការណ៍នៅថ្ងៃព្រហស្បតិ៍ (ទី១៩ ខែមីនា ឆ្នាំ២០២៦) នេះថា សមាជិកសភាអ៊ីរ៉ង់ បានស្នើផែនការមួយ ដើម្បីយកថ្លៃឈ្នួល និងដាក់ពន្ធលើនាវាដែលឆ្លងកាត់ច្រកសមុទ្រជាយុទ្ធសាស្ត្រ Hormuz។

មន្ត្រីទាំងនោះបានលើកឡើងថា លក្ខខណ្ឌដឹកជញ្ជូនតាមផ្លូវទឹកនេះ នឹងមិនវិលត្រឡប់វិញឡើយទៅរកស្ថានភាពមុនសង្គ្រាមមជ្ឈិមបូព៌ា ដែលបានចាប់ផ្តើមឡើងដោយការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់ កាលពីថ្ងៃទី២៨ ខែកុម្ភៈ។

សមាជិកសភាទីក្រុងតេអេរ៉ង់ម្នាក់ លោកស្រី Somayeh Rafiei ត្រូវបានដកស្រង់សម្តីដោយទីភ្នាក់ងារសារព័ត៌មាន ISNA ដែលបាននិយាយថា៖ «យើងនៅក្នុងសភា កំពុងជំរុញផែនការមួយដែលប្រទេសនានា នឹងត្រូវបង់ថ្លៃឈ្នួល និងពន្ធដល់សាធារណរដ្ឋឥស្លាម ប្រសិនបើច្រកសមុទ្រ Hormuz ត្រូវបានប្រើជាផ្លូវសុវត្ថិភាព សម្រាប់ការដឹកជញ្ជូន ថាមពល និងសន្តិសុខស្បៀងអាហារ»។

លោកស្រី បានបន្ថែមថា៖ «សន្តិសុខនៃច្រកសមុទ្រនេះ នឹងត្រូវបានបង្កើតឡើងដោយកម្លាំង សិទ្ធអំណាច និងភាពអស្ចារ្យរបស់សាធារណរដ្ឋអ៊ីស្លាមអ៊ីរ៉ង់ ហើយប្រទេសនានាត្រូវតែបង់ពន្ធជាថ្នូរ»។

ចរាចរណ៍ឆ្លងកាត់ច្រកសមុទ្រដ៏សំខាន់នេះ ត្រូវបានធ្វើឲ្យស្ទើរតែលែងមាន ចាប់តាំងពីការចាប់ផ្តើមនៃសង្គ្រាម។ កងកម្លាំងអ៊ីរ៉ង់ បានវាយប្រហារនាវាជាច្រើនគ្រឿង ដោយបញ្ជាក់ថា ពួកគេមិនបានយកចិត្តទុកដាក់ចំពោះ «ការព្រមាន» ប្រឆាំងនឹងការឆ្លងកាត់ផ្លូវទឹកនេះ។

ប្រធានសភា លោក Mohammad Bagher Ghalibaf បាននិយាយកាលពីថ្ងៃអង្គារថា ចរាចរណ៍នៅផ្លូវទឹកនេះ នឹងមិនវិលត្រឡប់ទៅរកស្ថានភាពមុនសង្គ្រាមវិញឡើយ។ តែក្នុងរយៈពេលប៉ុន្មានថ្ងៃថ្មីៗនេះ អ៊ីរ៉ង់បានអនុញ្ញាតឲ្យនាវាមួយចំនួនមកពីប្រទេសដែលខ្លួនចាត់ទុកថា ជាមិត្ត ឆ្លងកាត់ ខណៈពេលដែលព្រមានថា ខ្លួននឹងរារាំងនាវាមកពីប្រទេសដែលខ្លួនយល់ថា បានចូលរួម «ការឈ្លានពាន» លើខ្លួន៕