កងកម្លាំងប្រដាប់អាវុធអ៊ីរ៉ង់ បានព្រមាននៅថ្ងៃព្រហស្បតិ៍នេះថា រាល់ការវាយប្រហារបន្ថែមទៀតលើហេដ្ឋារចនាសម្ព័ន្ធអ៊ីរ៉ង់ នឹងបង្កឲ្យមានការសងសឹកខ្លាំងជាងមុន ។ នេះបើយោងតាមសេចក្តីថ្លែងការណ៍ចាក់ផ្សាយលើកញ្ចក់ទូរទស្សន៍របស់អ្នកនាំពាក្យយោធាអ៊ីរ៉ង់ ។

លោក Ebrahim Zolfaghari គឺជាអ្នកនាំពាក្យមូលដ្ឋានទ័ព Khatam al-Anbia និយាយថា កងកម្លាំងអ៊ីរ៉ង់ បានបើកការវាយប្រហារសងសឹករួចទៅហើយ បង្កឲ្យមានអគ្គិភ័យនៅរោងចក្រប្រេង ដែលជាផលប្រយោជន៍របស់សហរដ្ឋអាមេរិកនៅក្នុងតំបន់ ហើយលោកបានធ្វើការសង្កត់ធ្ងន់ថា ការឆ្លើយតបរបស់អ៊ីរ៉ង់ នៅតែបន្ត ។

លោកនិយាយទៀតថា ការវាយប្រហារមីស៊ីល និងយានដ្រូនអ៊ីរ៉ង់ មានគោលដៅលើមូលដ្ឋានយោធាជាច្រើនកន្លែងរបស់សហរដ្ឋអាមេរិក នៅក្នុងតំបន់ឈូងសមុទ្រ ។

គួរឲ្យដឹងថា តម្លៃឧស្ម័នអឺរ៉ុប បានហក់ឡើងខ្ពស់ចំនួន ២៥ភាគរយ ហើយប្រេងកើនឡើងចំនួន ១០ភាគរយ នៅថ្ងៃព្រហស្បតិ៍នេះ ក្រោយអ៊ីរ៉ង់ វាយប្រហារហេដ្ឋារចនាសម្ព័ន្ធក្នុងតំបន់មជ្ឈិមបូព៌ា ជាការសងសឹកនឹងការវាយប្រហាររបស់អ៊ីស្រាអែលលើរោងចក្រឧស្ម័នរបស់ពួកគេ ធ្វើឲ្យវាក្លាយជាការរីកធំបំផុតនៃសង្រ្គាមរយៈពេលជិត ៣សប្តាហ៍កន្លងមកនេះ ។

ការវាយប្រហារតាមច្រកអាកាសរបស់អ៊ីរ៉ង់ បណ្តាលឲ្យមានការខូចខាតទ្រង់ទ្រាយធំ នៅរោងចក្រឧស្ម័នធំបំផុតរបស់ពិភពលោក ស្ថិតក្នុងប្រទេសកាតា ហើយពួកគេបានវាយប្រហារលើគោលដៅចម្រាញ់ប្រេងនៅអារ៉ាប៊ីសាអ៊ូឌីត បង្ខំឲ្យអារ៉ាប់រួម បិទរោងចក្រឧស្ម័នរបស់ខ្លួន ហើយនិងចាប់ផ្តើមវាយប្រហាររោងចក្រចម្រាញ់ប្រេង ២កន្លែងទៀតរបស់គូវ៉ែត ៕