វិមានក្រឹមឡាំងបាននិយាយកាលពីថ្ងៃព្រហស្បតិ៍១៩មីនា សប្ដាហ៍នេះថា កិច្ចចរចារវាងទីក្រុងវ៉ាស៊ីនតោន ទីក្រុងមូស្គូ និងទីក្រុងគីវ ស្តីពីការបញ្ចប់សង្គ្រាមនៅអ៊ុយក្រែន គឺស្ថិតនៅលើ ការផ្អាកតាមស្ថានភាពជាក់ស្ដែង បន្ទាប់ពីការចាប់ផ្តើមនៃសង្គ្រាមអ៊ីរ៉ង់ ប៉ុន្តែប្រធានាធិបតីអ៊ុយក្រែន បាននិយាយថា ការពិភាក្សាថ្មីត្រូវបានរំពឹងទុកនៅចុងសប្តាហ៍នេះ។

ប្រធានាធិបតីសហរដ្ឋអាមេរិក លោក Donald Trump បានសន្យាថានឹងបញ្ចប់សង្គ្រាមអ៊ុយក្រែន នៅពេលលោកវិលត្រឡប់ទៅកាន់សេតវិមានវិញ ប៉ុន្តែបាននិយាយថា កិច្ចខិតខំប្រឹងប្រែងដើម្បីដោះស្រាយជម្លោះនេះ គឺជាការខកចិត្តដ៏ធំបំផុតមួយរបស់លោក។

កាសែត Izvestia បានចុះផ្សាយនៅលើទំព័រមុខថា វិមានក្រឹមឡាំងបានបញ្ជាក់ពីការផ្អាកកិច្ចចរចាលើអ៊ុយក្រែន ហើយសង្គ្រាមនៅមជ្ឈិមបូព៌ាអាចជំរុញទីក្រុងគីវឆ្ពោះទៅរកការសម្របសម្រួល។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មាន នៅពេលសួរអំពីរបាយការណ៍ពីការសែត Izvestia ថា នេះគឺជាការផ្អាកតាមស្ថានភាពជាក់ស្ដែង សម្រាប់ហេតុផលជាក់ស្តែង។

លោក Peskov បាននិយាយថា ដរាបណា ដៃគូអាមេរិករបស់ពួកលោក អាចយកចិត្តទុកដាក់បន្ថែមទៀតចំពោះកិច្ចការអ៊ុយក្រែន ទីក្រុងមូស្គូសង្ឃឹមថា ការផ្អាកនេះអាចបញ្ចប់ ហើយថា កិច្ចចរចាជុំថ្មីអាចកើតឡើង។

នៅទីក្រុងគីវ ប្រធានាធិបតីអ៊ុយក្រែន លោក Volodymyr Zelenskyy បាននិយាយថា វាដល់ពេលហើយដើម្បីបញ្ចប់ការផ្អាក ហើយទីក្រុងវ៉ាស៊ីនតោនបានបញ្ជូនសញ្ញាថា ខ្លួនត្រៀមខ្លួនរួចជាស្រេចដើម្បីបន្តការចរចា។ក្រុមចរចាអ៊ុយក្រែនមួយក្រុមបានត្រៀមរួចហើយក្នុងការធ្វើដំណើរទៅកាន់សហរដ្ឋអាមេរិកសម្រាប់កិច្ចចរចាចុងសប្តាហ៍នេះ៕