លោក Donald Trump បានលើកឡើងកាលពីថ្ងៃព្រហស្បតិ៍ ១៩មីនាសប្ដាហ៍នេះថា លោកមិនមានគម្រោងដាក់ពង្រាយកងទ័ពអាមេរិកទៅកាន់មជ្ឈិមបូព៌ាទេ ខណៈសង្គ្រាមអ៊ីរ៉ង់ជិតឈានដល់សប្តាហ៍ទីបួន។  

នៅពេលត្រូវបានសួរដោយក្រុមអ្នកសារព័ត៌មានលោក Trump បានប្រាប់ថា ទេ រូបលោកនឹងមិនដាក់កងទ័ពនៅកន្លែងណាទេ។ប្រសិនបើលោកដាក់ លោកពិតជាមិនប្រាប់អ្នកទាំងអស់គ្នាទេ ប៉ុន្តែលោកនឹងមិនដាក់ពង្រាយកងទ័ពឡើយ។

ការអត្ថាធិប្បាយរបស់លោកកើតឡើង ខណៈអាមេរិកកំពុងថ្លឹងថ្លែងថាតើត្រូវអនុវត្តរយៈពេលប៉ុន្មានដើម្បីលុបបំបាត់កម្មវិធីអាវុធរបស់អ៊ីរ៉ង់ រួមទាំងការរឹបអូសសម្ភារៈនុយក្លេអ៊ែររបស់អ៊ីរ៉ង់ដែលត្រូវបានគេគិតថានៅតែកប់ក្រោមគំនរបាក់បែក ទោះបីជាប្រតិបត្តិការយោធាកាលពីរដូវក្តៅមុនដែលលោក Trump បានប្រកាសថា បានបំផ្លាញសមត្ថភាពនុយក្លេអ៊ែររបស់ប្រទេសនេះក៏ដោយ។ ប្រតិបត្តិការបែបនេះទំនងជាត្រូវការកងទ័ពអាមេរិកមួយចំនួនធំដើម្បីបញ្ជូនទៅប្រទេសអ៊ីរ៉ង់។

សារព័ត៌មាន Reuters បានរាយការណ៍ថា រដ្ឋបាលលោក Trump ក៏កំពុងពិចារណាផងដែរថាតើត្រូវបញ្ជូនកងកម្លាំងអាកាស និងកងទ័ពជើងទឹកទៅកាន់ប្រទេសអ៊ីរ៉ង់ ឬអត់ ដើម្បីជួយធានាការឆ្លងកាត់ដោយសុវត្ថិភាពសម្រាប់នាវាដឹកប្រេងឆ្លងកាត់ច្រកសមុទ្រ Hormuz ដែលអ៊ីរ៉ង់បានបិទជាការឆ្លើយតបទៅនឹងសង្គ្រាម ជាចំណាត់ការមួយដែលទំនងជាពាក់ព័ន្ធនឹងការបញ្ជូនកងទ័ពអាមេរិកទៅកាន់ឆ្នេរសមុទ្ររបស់ប្រទេសអ៊ីរ៉ង់។

កាលពីដើមខែនេះ លោក Trump បានបដិសេធមិនច្រានចោលលទ្ធភាពនៃការបញ្ជូនកងទ័ពជើងគោកទៅកាន់ប្រទេសអ៊ីរ៉ង់ទេ។ ក្នុងបទសម្ភាសន៍ជាមួយកាសែត New York Post ត្រឹមតែប៉ុន្មានថ្ងៃបន្ទាប់ពីសហរដ្ឋអាមេរិក និងអ៊ីស្រាអែលបានចាប់ផ្តើមការវាយប្រហារដំបូងលើប្រទេសអ៊ីរ៉ង់ ដែលបានចាប់ផ្តើមសង្គ្រាម លោក Trump បាននិយាយថា លោកនឹងបើកចំហចំពោះការដាក់ពង្រាយកងទ័ពជើងគោករបស់អាមេរិកទៅកាន់ប្រទេសអ៊ីរ៉ង់ ប្រសិនបើចាំបាច់៕