នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃព្រហស្បតិ៍ ទី១៩ ខែមីនា ថា អ៊ីរ៉ង់កំពុងត្រូវបាន «បំផ្លាញ» ហើយវាមិនច្បាស់នោះទេថាអ្នកណាជាអ្នកទទួលខុសត្រូវ ខណៈសាធារណរដ្ឋអ៊ីស្លាមមួយនេះ បានបន្តវាយប្រហារលើគោលដៅប្រេង និងឧស្ម័ននៅរដ្ឋឈូងសមុទ្រដែលបានធ្វើឱ្យទីផ្សារពិភពលោករង្គោះរង្គើ។

រយៈពេលជិតបីសប្តាហ៍ក្នុងសង្គ្រាមនៅមជ្ឈិមបូព៌ាដែលបានចាប់ផ្តើមដោយអ៊ីស្រាអែល និងសហរដ្ឋអាមេរិក លោក Netanyahu បាននិយាយថា ទីក្រុងតេអេរ៉ង់ លែងមានសមត្ថភាពចម្រាញ់សារធាតុអ៊ុយរ៉ានីញ៉ូម ឬផលិតមីស៊ីលបាលីស្ទីក ទៀតហើយ។ លោកបានថ្លែងនៅក្នុងសន្និសីទសារព័ត៌មានមួយថា «យើងកំពុងទទួលជ័យជម្នះ ហើយអ៊ីរ៉ង់កំពុងត្រូវបានបំផ្លាញ»។

លោក Netanyahu បានសាទរចំពោះកិច្ចសហប្រតិបត្តិការរបស់លោកជាមួយប្រធានាធិបតីសហរដ្ឋអាមេរិក លោក Donald Trump និងបាននិយាយថា ដោយមិនបានផ្តល់ពេលវេលាជាក់លាក់ណាមួយ លោកមើលឃើញថា «សង្គ្រាមនេះបញ្ចប់លឿនជាងអ្វីដែលមនុស្សជាច្រើនគិត»។ ការថ្លែងរបស់លោក បានធ្វើឡើងបន្ទាប់ពីសហរដ្ឋអាមេរិកបាននិយាយថា ពុំមានថ្ងៃផុតកំណត់ដើម្បីបញ្ចប់សង្គ្រាមដែលប្រទេសទាំងពីរបានចាប់ផ្តើមប្រឆាំងនឹងអ៊ីរ៉ង់នៅថ្ងៃទី២៨ ខែកុម្ភៈនោះទេ។ លោក Netanyahu ក៏បានទទូចផងដែរថា អ៊ីស្រាអែល «បានធ្វើសកម្មភាពតែម្នាក់ឯង» ចំពោះការវាយប្រហារកាលពីថ្ងៃពុធលើវាលឧស្ម័ន South Pars របស់ប្រទេសអ៊ីរ៉ង់ ដែលផ្គត់ផ្គង់ប្រហែល៧០ភាគរយនៃតម្រូវការក្នុងស្រុករបស់អ៊ីរ៉ង់។ លោក Trump បានបង្ហាញថា លោកមិនបានដឹងជាមុនអំពីការវាយឆ្មក់របស់អ៊ីស្រាអែលលើតំបន់ South Pars របស់អ៊ីរ៉ង់ទេ។ ប៉ុន្តែលោកបាននិយាយថា លោកបានប្រាប់លោក Netanyahu កុំឱ្យវាយប្រហារវាលឧស្ម័នរបស់អ៊ីរ៉ង់ម្តងទៀត។

លោក Netanyahu បានច្រានចោលការលើកឡើងថា លោកបានអូសទាញលោក Trump ចូលទៅក្នុងជម្លោះ ដោយបញ្ជាក់ថា លោកគឺជាដៃគូតូចតាចក្នុងការវាយប្រហាររួមគ្នាលើអ៊ីរ៉ង់។