ក្រសួងការបរទេសសហរដ្ឋអាមេរិក បានអនុម័តកិច្ចព្រមព្រៀងលក់សព្វាវុធតម្លៃ ១៦,៥ ពាន់លានដុល្លារដល់ប្រទេសអារ៉ាប់រួម គុយវ៉ែត និងប្រទេសហ្ស៊កដានី ខណៈភាពតានតឹងជាមួយអ៊ីរ៉ង់ បន្តកើនឡើង។ កាលពីថ្ងៃព្រហស្បតិ៍ ក្រសួងការបរទេសបានពន្យល់ថា អាវុធដែលមានតម្លៃ ៨,៤ ពាន់លានដុល្លារ នឹងលក់ទៅឱ្យប្រទេសអារ៉ាប់រួម ដើម្បីចំណាយសម្រាប់យានដ្រូន មីស៊ីល ប្រព័ន្ធរ៉ាដា និងយន្តហោះ F-16។

ខណៈជាផ្នែកមួយនៃកិច្ចព្រមព្រៀង ទីក្រុងវ៉ាស៊ីនតោនក៏បានអនុម័តប្រហែល ៨ ពាន់លានដុល្លារសម្រាប់ប្រព័ន្ធរ៉ាដាការពារដែនអាកាស និងមីស៊ីលទៅឲ្យប្រទេសគុយវ៉ែត និងបន្ថែម ៧០,៥ លានដុល្លារទៀតទៅឲ្យប្រទេសហ្ស៊កដានី ដែលនឹងគ្របដណ្តប់លើការគាំទ្រយន្តហោះ និងគ្រាប់រំសេវ។

ក្រសួងការបរទេសបាននិយាយនៅក្នុងសេចក្តីថ្លែងការណ៍ថា «ការលក់ដែលបានស្នើឡើងនេះ នឹងគាំទ្រដល់គោលនយោបាយការបរទេស និងគោលបំណងសន្តិសុខជាតិរបស់សហរដ្ឋអាមេរិក ដោយការធ្វើឲ្យប្រសើរសន្តិសុខរបស់ដៃគូការពារជាតិដ៏សំខាន់»។ ប្រទេសអារ៉ាប់រួម គឺជាកម្លាំងមួយសម្រាប់ស្ថិរភាពនយោបាយ និងវឌ្ឍនភាពសេដ្ឋកិច្ចនៅមជ្ឈិមបូព៌ា។

សេចក្តីថ្លែងការណ៍បាននិយាយបន្ថែមថា កិច្ចព្រមព្រៀងដែលបានស្នើឡើង មិនតម្រូវឱ្យមានការអនុម័តពីសភាទេ ដោយសាររដ្ឋមន្ត្រីការបរទេសលោក Marco Rubio បានផ្តល់ការបង្ហាញភស្តុតាងលម្អិតត្រឹមត្រូវថា មានគ្រាអាសន្នកើតមានដែលតម្រូវឱ្យមានការលក់អាវុធជាបន្ទាន់។

ការលក់នេះ កើតឡើងក្នុងពេលមានភាពតានតឹងកាន់តែខ្លាំងរវាងសហរដ្ឋអាមេរិក និងអ៊ីរ៉ង់។ រដ្ឋបាលរបស់លោកប្រធានាធិបតីអាមេរិក ដូណាល់ ត្រាំ បានចូលរួមជាមួយអ៊ីស្រាអែលក្នុងការវាយប្រហារលើអ៊ីរ៉ង់នៅថ្ងៃទី ២៨ ខែកុម្ភៈ ហើយសង្គ្រាមដែលកើតឡើងបានបង្កឱ្យមានការព្រួយបារម្ភអំពីជម្លោះក្នុងតំបន់ដែលអូសបន្លាយពេល។