ប្រធានគណៈកម្មការអឺរ៉ុប លោកស្រី Ursula von der Leyen បានលើកឡើងនៅព្រលឹមថ្ងៃសុក្រ (២០ មីនា) នេះថា សហភាពអឺរ៉ុប នឹងស្វះស្វែងរកគ្រប់វិធីដើម្បីបញ្ចេញប្រាក់កម្ចីចំនួន ៩០ពាន់លានអឺរ៉ូ (ប្រមាណ ១០៤,២ ពាន់លានដុល្លារ) ដែលបានសន្យា ឱ្យដល់អ៊ុយក្រែន បើទោះបីជាមានការជំទាស់ជាបន្តបន្ទាប់ពីហុងគ្រីក៏ដោយ។

លោកស្រី von der Leyen បានប្រាប់អ្នកយកព័ត៌មានបន្ទាប់ពីកិច្ចប្រជុំកំពូលនៅទីក្រុងព្រុចសែលថា៖ «ប្លុកនឹងសម្រេចរឿងនេះឱ្យបាន ទោះតាមវិធីណាក៏ដោយ»។ នៅក្នុងកិច្ចប្រជុំនោះ មេដឹកនាំសហភាពអឺរ៉ុប នៅតែបរាជ័យមិនអាចបញ្ចុះបញ្ចូលនាយករដ្ឋមន្ត្រីហុងគ្រី លោក Viktor Orban ឱ្យដកការរារាំងរបស់លោកលើប្រាក់កម្ចីដ៏សំខាន់សម្រាប់អ៊ុយក្រែនបានឡើយ។

ប្រធានក្រុមប្រឹក្សាអឺរ៉ុប លោក Antonio Costa បាននិយាយថា មេដឹកនាំប្លុកអឺរ៉ុប រិះគន់យ៉ាងខ្លាំងលើការរារាំងរបស់ហុងគ្រី ថាជាទង្វើ «ដែលមិនអាចទទួលយកបានឡើយ» ដោយបន្ថែមថា «កិច្ចព្រមព្រៀងគឺជាកិច្ចព្រមព្រៀង អឺរ៉ុបត្រូវតែរក្សាសម្តីរបស់ខ្លួន»។ អធិការបតីអាល្លឺម៉ង់ បានលើកឡើងថា មេដឹកនាំនានាបានស្នើឱ្យគណៈកម្មការអឺរ៉ុប ស្វែងរកវិធីបញ្ចេញប្រាក់កម្ចីនេះ ហើយលោកហៅការប្រើវេតូរបស់លោក Orban ថាជា «ទង្វើគ្មានភក្ដីភាពដ៏ធ្ងន់ធ្ងរ» ដែលមិនធ្លាប់មានពីមុនមកនោះទេ។

មេដឹកនាំប្លុកអឺរ៉ុប បានឯកភាពលើឥណទាននេះតាំងតែពីខែធ្នូ ឆ្នាំមុនមកម៉្លេះ ប៉ុន្តែលោក Orban ដែលមានទំនាក់ទំនងល្អជាមួយរុស្ស៊ី បានរារាំងមិនឱ្យអនុវត្តដំណើរការឥណទាននេះកាលពីខែមុន ដោយលើកឡើងពីវិវាទជុំវិញបំពង់បង្ហូរប្រេងដែលរងការខូចខាត។ ជំហររបស់លោក Orban បានបង្កឱ្យមានការខឹងសម្បាក្នុងចំណោមមេដឹកនាំប្លុកអឺរ៉ុបផ្សេងទៀត ខណៈទីក្រុងគីវ នឹងខ្វះខាតថវិកាក្នុងពេលប៉ុន្មានសប្តាហ៍ដ៏ខ្លីខាងមុខ ប្រសិនបើមិនទទួលបានមូលនិធិថ្មីទេនោះ៕