ភ្នំពេញ៖ នៅព្រឹកថ្ងៃទី​១៧ ខែមីនា ឆ្នាំ២០២១នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឲ្យមន្ត្រីចូលរួមរំលែកមរណទុក្ខដ៏ក្រៀមក្រំ ជាមួយក្រុមគ្រួសារសពលោក ឡៅ វណ្ណា អាយុ ៥០ឆ្នាំ ដែលបានទទួលមរណភាពដោយជំងឺកូវីដ-១៩ កាលពីថ្ងៃទី​១១ ខែមីនា ឆ្នាំ២០២១កន្លងទៅ ដែលនេះជាករណីស្លាប់លើកទី១នៅកម្ពុជា។

ស្ថិតក្នុងសមានទុក្ខដ៏ក្រៀមក្រំនេះ ឯកឧត្តម​វេជ្ជបណ្ឌិត អ៊ុយ សំអាត នាយកនាយកដ្ឋានគ្រប់គ្រងគ្រោះមហន្តរាយ​កាកបាទក្រហមកម្ពុជា បាននាំនូវសាររំលែកទុក្ខយ៉ាងក្រៀមក្រំពីសំណាក់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសូមបួងសួងដល់វិញ្ញាណក្ខន្ធសព បានទៅកាន់សុគតិភពកុំបីឃ្លៀងឃ្លាតឡើយ។ ​

ជាមួយគ្នានេះ ឯកឧត្តមវេជ្ជបណ្ឌិត បានលើកទឹកចិត្តដល់ភរិយានៃសព ត្រូវមានស្មារតីរឹងប៉ឹង ​ខិតខំតស៊ូដើម្បីជីវភាពគ្រួសារ និងអនាគតរបស់កូនៗ។ ទន្ទឹមនឹងនេះ សូមក្មួយៗជាកូនត្រូវខិតខំសិក្សារៀនសូត្រឱ្យបានពូកែ ដើម្បីអនាគតភ្លឺស្វាង និងត្រូវធ្វើខ្លួនជាកូនល្អ មិត្តល្អ ពលរដ្ឋល្អនៅក្នុងសង្គម។ បន្ថែមពីនេះ សូមអនុវត្តឱ្យបានម៉ឺងម៉ាត់នូវការបន្តធ្វើចត្តាឡីស័ក និងយកសំណាកឱ្យបានត្រឹមត្រូវតាមការកំណត់របស់គ្រូពេទ្យ ជាពិសេសអនុវត្ត ៣ការពារ ៣កុំ ឱ្យបានខ្ជាប់ខ្ជួន។ ​

សូមបញ្ជាក់ថា ដើម្បីជួយសម្រាលដល់ជីវភាពរស់នៅ​កាកបាទក្រហមកម្ពុជា បានឧបត្ថម្ភ​អង្ករ ១០០គីឡូក្រាម, មី៥កេស, ត្រីខ៥០កំប៉ុង, ទឹកក្រូច៥កេស និងថវិកាចំនួន ៥លានរៀល៕ អត្ថបទ៖ សំ ងីម​