អង្គការពាណិជ្ជកម្មពិភពលោក (WTO) បាននិយាយថា ជម្លោះដែលកំពុងបន្តនៅតំបន់មជ្ឈិមបូព៌ា កំពុងដាក់សម្ពាធយ៉ាងខ្លាំងលើការរំពឹងទុកនៃកំណើនពាណិជ្ជកម្មសកល និងបង្កការគំរាមកំហែងធ្វើឱ្យការព្យាករពាណិជ្ជកម្មសម្រាប់ឆ្នាំ២០២៦នេះ ឆ្ពោះទៅរកការធ្លាក់ចុះ។

របាយការណ៍របស់ WTO កាលពីថ្ងៃព្រហស្បតិ៍ ទី១៩ ខែមីនា បានឱ្យដឹងថា កំណើននៃពាណិជ្ជកម្មទំនិញពិភពលោក នឹងថយចុះយ៉ាងខ្លាំងមកត្រឹម ១,៩% នៅឆ្នាំនេះ បើធៀបនឹងអត្រា ៤,៦% កាលពីឆ្នាំ២០២៥ ហើយទិន្នន័យអាចនឹងបន្តធ្លាក់ចុះថែមទៀត ប្រសិនបើសង្គ្រាមមជ្ឈិមបូព៌ា នៅតែបន្តរុញច្រានតម្លៃថាមពលឱ្យឡើងខ្ពស់ និងរំខានដល់ការដឹកជញ្ជូនសកល។

កាលពីឆ្នាំមុន កំណើនពាណិជ្ជកម្មពាក់ព័ន្ធនឹងបញ្ញាសិប្បនិម្មិត (AI) និងការសម្រុកនាំចូលទំនិញទុកជាមុនដើម្បីចៀសវាងពន្ធរបស់អាមេរិក បានធ្វើឱ្យកំណើនសេដ្ឋកិច្ចល្អជាងការរំពឹងទុក។ លោកស្រី Ngozi Okonjo-Iweala ប្រធានអង្គការ WTO និយាយថា ទោះបីជាពាណិជ្ជកម្មសកលនៅតែមានភាពធន់ក៏ដោយ ប៉ុន្តែការព្យាករកំណើនកំពុងស្ថិតក្រោមសម្ពាធពីការពង្រីកវិសាលភាពនៃសង្គ្រាមរវាងអាមេរិក-អ៊ីស្រាអែល ប្រឆាំងនឹងអ៊ីរ៉ង់។

ក្រុមសេដ្ឋវិទូរបស់ WTO លើកឡើងថា បើតម្លៃប្រេងឆៅ និងឧស្ម័នធម្មជាតិរាវ នៅតែបន្តឡើងខ្ពស់ពេញមួយឆ្នាំ២០២៦ នោះពាណិជ្ជកម្មទំនិញសកលអាចនឹងថយចុះបន្ថែមទៀតមកត្រឹម ១,៤%។ របាយការណ៍ WTO បន្ថែមថា ការបិទច្រកសមុទ្រហ័រមូសរយៈពេលយូរដោយអ៊ីរ៉ង់ ដែលរារាំងការនាំចូលជីអ៊ុយរ៉េ ចំនួនមួយភាគបីនៃតម្រូវការសរុប ប្រឈមនឹងការប៉ះពាល់ដល់ផលិតករធំៗដូចជា ឥណ្ឌា ថៃ និងប្រេស៊ីល ដែលបង្កឱ្យមានហានិភ័យដល់សន្តិសុខស្បៀងសកល៕