ភ្ញៀវទេសចរ និងអ្នកដំណើរនៅក្នុងសង្កាត់ Midtown Manhattan ទីក្រុងញូវយ៉ក សហរដ្ឋអាមេរិក បង្ហាញនូវការខកចិត្ត មិនពេញចិត្ត ខឹងសម្បារ ក្តីបារម្ភ និងការហត់នឿយរបស់ពួកគេ ស្របពេលដែលសង្រ្គាមសហរដ្ឋអាមេរិក-អ៊ីស្រាអែលលើអ៊ីរ៉ង់ នៅតែបន្តធ្វើឲ្យប៉ះពាល់ដល់ការរស់នៅប្រចាំថ្ងៃរបស់ពួកគេ ចាប់ពីការឡើងថ្លៃតម្លៃប្រេង រហូតដល់ការបង្អាក់ការធ្វើដំណើរសកល ។

នៅលើទីលានចតុរង្គ Times Square អ្នកស្រី Laureen គឺជាអ្នកស្រុកមួយរូបមកពីរដ្ឋ Connecticut និយាយថា អ្នកស្រីតក់ស្លុតដោយសារតែជម្លោះមួយនេះ ។

អ្នកស្រីនិយាយថា ពួកយើងអាចរស់រានពីតម្លៃហ្គាស ប៉ុន្តែពួកយើងគិតថា វាគឺជាសង្រ្គាមខុសច្បាប់ដែលមិនគួរកើតឡើងទាល់តែសោះ ។ ពួកយើងមិនជឿលើរឿងមិនសមហេតុសមផលនេះទេថា ពួកគេគឺជាការគំរាមកំហែងដល់ពួកយើង ដែលជាការគំរាមកំហែងបន្ទាន់នោះ ។

លោក Raphael Vikor វ័យ ៥៣ឆ្នាំ គឺជាមន្រ្តីនគរបាលមួយរូបមកលេងអាមេរិកពីទីក្រុង Mulhouse ប្រទេសបារាំង និយាយថា ជម្លោះនេះមានការចំណាយដ៏ច្រើនសន្ធឹកសន្ធាប់ និងគ្រោះថ្នាក់ខ្លាំងណាស់ ។

លោកថា វាពិបាក និងគ្រោះថ្នាក់ សម្រាប់ទាហាន មនុស្សច្រើនណាស់ បានស្លាប់ ។ អ៊ីរ៉ង់ប្រើប្រាស់យានដ្រូនដែលមិនថ្លៃ ហើយអាមេរិកប្រើសុទ្ធតែមីស៊ីលដែលមានតម្លៃថ្លៃខ្លាំងណាស់ ។ ពួកយើងគួរតែប្រើលុយទាំងនេះលើរឿងផ្សេង សម្រាប់មនុស្សនៅទីនេះ ឬនៅលើពិភពលោក ។

ក្រុមអ្នកវិភាគនិយាយថា ការប្រើប្រាស់ណាមួយនៃទាហានជើងគោកសហរដ្ឋអាមេរិក សូម្បីតែក្នុងបេសកកម្មមានដែនកំណត់ក៏ដោយ ក៏អាចនឹងក្លាយជាហានិភ័យនយោបាយដុំកំភួនមួយសម្រាប់លោក Trump ធ្វើឲ្យមានការគាំទ្រទាបនៅក្នុងចំណោមសាធារណជនអាមេរិក សម្រាប់យុទ្ធនាការនៅអ៊ីរ៉ង់ ហើយយុទ្ធនាការបោះឆ្នោតខ្លួនឯងរបស់លោក Trump ក៏បានសន្យាផងដែរថានឹងបញ្ចៀសជម្លោះថ្មីរបស់អាមេរិកនៅមជ្ឈិមបូព៌ា ៕