ការវាយប្រហាររបស់អ៊ីរ៉ង់ បានធ្វើឲ្យសមត្ថភាពនាំចេញឧស្ម័នធម្មជាតិរាវ (LNG) របស់កាតា ធ្លាក់ចុះ ១៧ភាគរយ ដែលបណ្តាលឲ្យបាត់បង់ប្រាក់ចំណូលប្រចាំឆ្នាំប្រមាណ ២០ពាន់លានដុល្លារ និងគំរាមកំហែងដល់ការផ្គត់ផ្គង់ទៅកាន់តំបន់អឺរ៉ុប និងអាស៊ី។ នេះបើយោងតាមនាយកប្រតិបត្តិរបស់ក្រុមហ៊ុន QatarEnergy និងជារដ្ឋមន្ត្រី ទទួលបន្ទុកកិច្ចការថាមពល ដែលបានប្រាប់សារព័ត៌មាន Reuters កាលពីថ្ងៃព្រហស្បតិ៍ (ទី១៩ ខែមីនា ឆ្នាំ២០២៦)។

លោក Saad al-Kaabi បាននិយាយថា រថភ្លើងដឹក LNG ចំនួន ២ ក្នុងចំណោម ១៤គ្រឿងរបស់កាតា និងកន្លែងបំលែងឧស្ម័នទៅជាសារធាតុរាវ (GTL) មួយក្នុងចំណោម ២ របស់ខ្លួន ត្រូវរងខូចខាត នៅក្នុងការវាយប្រហារដែលមិនធ្លាប់មានពីមុន។ ហើយនៅក្នុងបទសម្ភាសន៍មួយ លោកបានប្រាប់ថា ការជួសជុលនេះ នឹងកាត់បន្ថយការផលិតឧស្ម័នធម្មជាតិរាវ ១២.៨លានតោន ក្នុង ២ឆ្នាំ រយៈពេលពី ៣ ទៅ ៥ឆ្នាំ។

លោក Kaabi បានលើកឡើងថា៖ «ខ្ញុំមិនធ្លាប់ស្រមៃទាល់តែសោះថា ប្រទេសកាតា និងតំបន់ នឹងស្ថិតនៅក្នុងការវាយប្រហារបែបនេះ ជាពិសេសពីប្រទេសបងប្អូនមូស្លីម នៅក្នុងខែរ៉ម៉ាដននេះ ដោយបានវាយប្រហារយើងតាមវិធីនេះ»។

ប៉ុន្មានម៉ោងមុននេះ អ៊ីរ៉ង់បានកំណត់គោលដៅវាយប្រហារជាបន្តបន្ទាប់ទៅលើរោងចក្រប្រេង និងឧស្ម័ននៅតំបន់ឈូងសមុទ្រ បន្ទាប់ពីមានការវាយប្រហារដោយអ៊ីស្រាអែល លើហេដ្ឋារចនាសម្ព័ន្ធឧស្ម័នរបស់ខ្លួន។

លោក Kaabi បានឲ្យដឹងទៀតថា ក្រុមហ៊ុន QatarEnergy ដែលគ្រប់គ្រងដោយរដ្ឋ នឹងត្រូវប្រកាសពីករណីប្រធានសក្តិ លើកិច្ចសន្យារយៈពេលវែងរហូតដល់ ៥ឆ្នាំ សម្រាប់ការផ្គត់ផ្គង់ឧស្ម័នធម្មជាតិរាវ (LNG) ដែលត្រូវដឹកជញ្ជូនឆ្ពោះទៅកាន់ប្រទេសអ៊ីតាលី បែលហ្ស៊ិក កូរ៉េខាងត្បូង និងចិន ដោយសារតែរថភ្លើង ២គ្រឿងរងការខូចខាត។ ក្រុមហ៊ុន QatarEnergy បានប្រកាសពីករណីប្រធានសក្ដិ លើទិន្នផល LNG ទាំងមូល បន្ទាប់ពីមានការវាយប្រហារនៅមុននេះ លើមជ្ឈមណ្ឌលផលិតកម្ម Ras Laffan របស់ខ្លួន ដែលបានរងការវាយប្រហារម្តងទៀត កាលពីថ្ងៃពុធ៕