ក្រុមអ្នកជំនាញនិយាយថា ការអាក់ខានការដឹកជញ្ជូនដោយសារសង្រ្គាមសហរដ្ឋអាមេរិក-អ៊ីស្រាអែលជាមួយអ៊ីរ៉ង បានរឹតត្បិតការផ្គត់ផ្គង់ហ្គាសទៅកាន់ប្រទេសឥណ្ឌា ដែលអាចជំរុញឲ្យប្រទេសមួយនេះ វិលត្រលប់ទៅរកប្រើប្រាស់ឥន្ធនៈកខ្វក់ដូចជាធ្យូងថ្ម ប្រេងកាត និងជីវម៉ាស ។

មាននូវសេចក្តីការណ៍លើកឡើងថា តំបន់មួយចំនួននៅក្នុងប្រទេសឥណ្ឌា ឃើញមានការកើនឡើងការលក់អុស ខណៈតំបន់ខ្លះទៀត មើលឃើញការកើនឡើងការលក់ធ្យូងអនាម័យ ដែលវត្ថុទាំង ២នេះ គឺជាឥន្ធនៈជីវម៉ាស ។

ប្រទេសឥណ្ឌា ព្យាយាមដោះស្រាយការរឹតត្បិតការផ្គត់ផ្គង់ហ្គាសចម្អិនអាហារ ក្នុងរយៈពេលប៉ុន្មានថ្ងៃកន្លងមកនេះ ជាហេតុនាំឲ្យមានការសម្រុកទិញដោយអ្នកប្រើប្រាស់ក្នុងស្រុក ។

សង្រ្គាមដែលបានចាប់ផ្តើមកាលពីថ្ងៃទី ២៨ ខែកុម្ភៈ បានបង្អាក់ការដឹកជញ្ជូនឆ្លងកាត់ច្រកសមុទ្រ Hormuz ។ ប្រហែល ១ភាគ ៥នៃការឆ្លងកាត់ប្រេង និងឧស្ម័នធម្មជាតិ ត្រូវឆ្លងកាត់ច្រកសមុទ្រដ៏តូចចង្អៀតមួយនេះ ។

រដ្ឋមន្រ្តីការបរទេសឥណ្ឌាលោក S Jaishankar និយាយថា កិច្ចប្រជុំជាមួយអ៊ីរ៉ង់ អាចនឹងបន្ធូរបន្ថយការអាក់ខានមួយនេះ នៅក្នុងច្រកសមុទ្រ Hormuz ។ ចាប់តាំងពីថ្ងៃចន្ទរហូតមក នាវាដោតទង់ជាតិឥណ្ឌា ៣គ្រឿង ក្នុងនោះនាវា ២គ្រឿងដឹកឧស្ម័ន LPG និងនាវាមួយគ្រឿងដឹកប្រេងឆៅ បានធ្វើដំណើរដល់រដ្ឋភាគខាងលិច Gujarat របស់ប្រទេសឥណ្ឌា ប៉ុន្តែនាវាប្រហែល ២១គ្រឿងទៀត បន្តជាប់គាំង ៕