ជនមូស្លីមនៅជុំវិញពិភពលោក បានប្រារព្ធពិធីបុណ្យ Eid al-Fitr នៅថ្ងៃសុក្រនេះ ដែលជាការបញ្ចប់ខែពិសិដ្ឋរ៉ាម៉ាឌន អំឡុងពេលដែលពួកគេតមអាហារចាប់ពីពេលថ្ងៃរះ រហូតដល់ពេលថ្ងៃលិច ។

បុណ្យរ៉ាម៉ាឌន បញ្ចប់ជាមួយការមើលឃើញព្រះចន្ទថ្មី ដែលនាំឲ្យដល់ខែ Shawwal ។ ដោយសារប្រទេសមួយចំនួនពឹងផ្អែកការមើលឃើញព្រះចន្ទជាក់ស្តែង ពេលវេលាអាចខុសគ្នាតាមទីកន្លែង ។ ប្រទេសជាច្រើន រួមទាំងម៉ាលី នីហ្សេរីយ៉ា និងអាហ្វហ្គានីស្ថាន បានរៀបចំពិធីបុណ្យ Eid កាលពីថ្ងៃព្រហស្បតិ៍ម្សិលមិញ ។

ប្រទេសផ្សេងទៀត ទូទាំងតំបន់មជ្ឈិមបូព៌ា អាហ្វ្រិក និងអាស៊ីអាគ្នេយ៍ រៀបចំពិធីបុណ្យ Eid នៅថ្ងៃសុក្រ ។ ពិធីសាសនានេះ មានរយៈពេល ២ថ្ងៃ ហើយខុសគ្នាពីពិធីបុណ្យ Eid al-Adha ដែលធ្វើឡើង អំឡុងធម្មយាត្រាហាជ ។ 

តាមធម្មតា ពិធីបុណ្យ Eid al-Fitr ចាប់ផ្តើមជាមួយការអធិស្ឋានរួមគ្នានៅទីខាងក្រៅ ហើយនិងជាឱកាសមួយឲ្យក្រុមគ្រួសារ និងមិត្តភ័ក្តិ បានជួបជុំគ្នា និងចួលរួមពិធីអធិដ្ឋានទ្រង់ទ្រាយធំ និងពិធីបុណ្យ ។

សម្រាប់ប្រទេសមូស្លីម ពិធីបុណ្យឆ្នាំនេះ កើតមានក្រោមស្រមោលនៃជម្លោះ និងអស្ថិរភាព ។ នៅប្រទេសអ៊ីរ៉ង់ សង្រ្គាមកំពុងបន្ត បណ្តាលឲ្យមានការអាក់ខានទ្រង់ទ្រាយធំ ខណៈតំបន់ខ្លះទៀតនៅឈូងសមុទ្រ ប្រឈមនឹងឥទ្ធិពលរាលដាលនៃការកើនឡើងភាពតានតឹងក្នុងតំបន់ ៕