ប្រធានាធិបតី លោក Anura Kumara Dissanayake បាននិយាយនៅថ្ងៃសុក្រ (ទី២០ ខែមីនា ឆ្នាំ២០២៦) នេះថា ស្រីលង្កាបានបដិសេធមិនអនុញ្ញាតឲ្យសហរដ្ឋអាមេរិកចូលចតយន្តហោះចម្បាំង ២គ្រឿងរបស់ខ្លួន នៅអាកាសយានដ្ឋានស៊ីវិលមួយ នៅភាគខាងត្បូងនៃប្រទេសកោះនេះ កាលពីដើមខែមីនា។

លោក Dissanayake បានប្រាប់សភាថា ទីក្រុងវ៉ាស៊ីនតោនចង់ប្តូរទីតាំងយន្តហោះចម្បាំងបំពាក់ដោយមីស៊ីល ២គ្រឿងរបស់ខ្លួន ពីមូលដ្ឋានមួយ នៅប្រទេសជីប៊ូទី (Djibouti) ទៅកាន់អាកាសយានដ្ឋានអន្តរជាតិស៊ីវិល Mattala របស់ស្រីលង្កា។

លោកបាននិយាយថា សំណើនេះ ដែលបានធ្វើឡើងកាលពីថ្ងៃទី២៦ ខែកុម្ភៈ ត្រូវបានបដិសេធ ដើម្បីបន្តរក្សាអព្យាក្រឹតភាពរបស់ទីក្រុងកូឡុំបូ និងធានាថា ទឹកដីរបស់ខ្លួន មិនត្រូវបានប្រើប្រាស់ សម្រាប់គោលបំណងយោធាណាមួយ ដែលអាចទាំងជួយ ឬរារាំងភាគីណាមួយ។

ប្រទេសកោះនៅមហាសមុទ្រឥណ្ឌាមួយនេះ ត្រូវបានទាញឲ្យធ្លាក់ចូលទៅក្នុងផលវិបាកនៃសង្គ្រាម នៅពេលដែលនាវាមុជទឹកអាមេរិក បានបាញ់មីស៊ីលលើនាវាចម្បាំងអ៊ីរ៉ង់ ១គ្រឿងឈ្មោះ IRIS Dena ចម្ងាយតែបន្តិចម្ដុំឆ្នេរសមុទ្ររបស់ខ្លួន នៅខែមីនានេះ។

លោក Dissanayake បាននិយាយថា៖ «ពួកគេចង់នាំយកយន្តហោះចម្បាំង ២គ្រឿង ដែលបំពាក់ដោយមីស៊ីលប្រឆាំងនាវា ៨គ្រាប់ ទៅកាន់អាកាសយានដ្ឋានអន្តរជាតិ Mattala ចាប់ពីថ្ងៃទី៤ ដល់ថ្ងៃទី៨ ខែមីនា ហើយយើងបានឆ្លើយថា ទេ»។

តែយ៉ាងណាក្ដី លោកមិនបានបញ្ជាក់នោះទេថា តើសំណើរបស់សហរដ្ឋអាមេរិក គឺប្រើប្រាស់ប្រទេសស្រីលង្កាជាមូលដ្ឋាន ដើម្បីឲ្យយន្តហោះអនុវត្តវិធានការវាយលុកណាមួយ លើអ៊ីរ៉ង់ដែរ ឬអត់។

ប្រភពពីយោធាស្រីលង្កា បានប្រាប់សារព័ត៌មាន AFP ថា ប្រទេសស្រីលង្កានឹងមិនអនុញ្ញាតឲ្យដែនអាកាសរបស់ខ្លួនត្រូវបានប្រើប្រាស់ ដើម្បីបើកការឈ្លានពានលើប្រទេសដទៃទៀតឡើយ ពោលគឺស្របតាមគោលនយោបាយការបរទេសរបស់កោះនេះ៕