រដ្ឋមន្ត្រីក្រសួងការពារជាតិ លោក Pete Hegseth កាលពីថ្ងៃព្រហស្បតិ៍ (ទី១៩ ខែមីនា ឆ្នាំ២០២៦) បានបដិសេធការរិះគន់ ដែលថា សង្គ្រាមរបស់សហរដ្ឋអាមេរិកលើអ៊ីរ៉ង់ បង្កជាហានិភ័យក្លាយជា «ភាពចលាចល» ខាងយោធា ខណៈដែលការវាយប្រហាររបស់អ៊ីរ៉ង់ លើហេដ្ឋារចនាសម្ព័ន្ធថាមពល បានជំរុញឲ្យតម្លៃថាមពលឡើងកាន់តែខ្ពស់។

នៅក្នុងសន្និសីទសារព័ត៌មានមួយ នាព្រឹកថ្ងៃព្រហស្បតិ៍នោះ លោក Hegseth បានលើកឡើងថា៖ «ប្រព័ន្ធផ្សព្វផ្សាយនៅទីនេះ ដែលមិនមែនទាំងអស់នោះទេ ប៉ុន្តែភាគច្រើន ចង់ឲ្យអ្នកគ្រប់គ្នាគិតថា ពោលគឺដោយត្រឹមតែ ១៩ថ្ងៃប៉ុណ្ណោះ ក្នុងជម្លោះនេះ យើងកំពុងឆ្ពោះទៅរកស្ថានភាពធ្ងន់ធ្ងរគ្មានទីបញ្ចប់ ឬសង្គ្រាមជារៀងរហូត ឬភាពច្របូកច្របល់។ សូមយល់ថា គ្មានអ្វីអាចទៅហួសពីការពិតនោះឡើយ»។

លោក Hegseth បានបញ្ជាក់ថា សហរដ្ឋអាមេរិក កំពុង «ទទួលបានជ័យជម្នះយ៉ាងជាក់ស្ដែង» ដោយបានបំផ្លាញឃ្លាំងអាវុធមីស៊ីលបាលីស្ទិករបស់អ៊ីរ៉ង់ កងទ័ពជើងទឹក និងនាវាមុជទឹករបស់ពួកគេ។ យ៉ាងណាក្ដី លោកបានបដិសេធមិនឆ្លើយសំណួរ ពាក់ព័ន្ធនឹងពេលវេលាជាក់លាក់ ប៉ុន្តែបាននិយាយថា សហរដ្ឋអាមេរិក «កំពុងស្ថិតនៅលើផែនការ» ដែលមាន «គោលបំណងច្បាស់លាស់» ហើយនឹងបញ្ចប់ជម្លោះ នៅពេលណាដែល «ប្រធានាធិបតី នៅទីបំផុត សម្រេចបែបហ្នឹង»។

ជាមួយគ្នានេះ ក្នុងសន្និសីទនោះ លោក Hegseth ក៏បានរិះគន់ផងដែរ ចំពោះសម្ព័ន្ធមិត្តអឺរ៉ុប ដែលភាគច្រើន បានគេចវេះពីសំណើរបស់លោកប្រធានាធិបតី Donald Trump ដែលសុំឲ្យជួយត្រួតពិនិត្យច្រកសមុទ្រហ័រមូស ក្នុងពេលមានការគំរាមកំហែងពីអ៊ីរ៉ង់ ដែលបានបិទផ្លូវទឹកដ៏សំខាន់មិនឲ្យនាវាដឹកប្រេង និងឧស្ម័នសកលធ្វើចរាចរណ៍៕