យោធាអ៊ីស្រាអែល នៅថ្ងៃសុក្រ (ទី២០ ខែមីនា ឆ្នាំ២០២៦) នេះ បានប្រាប់ឲ្យដឹងថា ខ្លួនបានវាយប្រហារជំរំកងទ័ពស៊ីរី ជាការឆ្លើយតបទៅនឹងអ្វីដែលខ្លួនចាត់ទុកថា ជាការកំណត់គោលលើសហគមន៍ Druze នៅក្នុងខេត្ត Sweida ភាគខាងត្បូង។

ការផ្ទុះឡើងនូវជម្លោះចុងក្រោយ រវាងប្រទេសជិតខាងទាំង២ បានកើតឡើងនៅពេលដែលសង្គ្រាម កំពុងរីករាលដាលនៅតំបន់មជ្ឈិមបូព៌ា បន្ទាប់ពីសហរដ្ឋអាមេរិក និងអ៊ីស្រាអែល បានវាយប្រហារអ៊ីរ៉ង់ កាលពីថ្ងៃទី២៨ ខែកុម្ភៈ។

យោធាអ៊ីស្រាអែលបានឲ្យដឹងថា៖ «ពេញមួយយប់ IDF (កងកម្លាំងការពារជាតិអ៊ីស្រាអែល) បានវាយប្រហារទីស្នាក់ការកណ្តាល និងអាវុធ នៅជំរំយោធារបស់របបស៊ីរី នៅភាគខាងត្បូងប្រទេសស៊ីរី។ នេះគឺជាការឆ្លើយតបទៅនឹងព្រឹត្តិការណ៍ កាលពីម្សិលមិញ ដែលជនស៊ីវិល Druze ត្រូវបានវាយប្រហារ នៅក្នុងតំបន់ (Sweida)។ IDF នឹងមិនអនុញ្ញាតឲ្យមានគ្រោះថ្នាក់កើតឡើងជាដាច់ខាត ចំពោះសហគមន៍ជនជាតិ Druze នៅក្នុងប្រទេសស៊ីរី ហើយនឹងបន្តចាត់វិធានការ ដើម្បីការពារពួកគេ»។

អ្នកឃ្លាំមើលសិទ្ធិមនុស្សស៊ីរីបានរាយការណ៍កាលពីថ្ងៃព្រហស្បតិ៍ថា ការប៉ះទង្គិចគ្នា បានផ្ទុះឡើង រវាងកងកម្លាំងរដ្ឋាភិបាល និងយុទ្ធជនមកពីកុលសម្ព័ន្ធក្នុងតំបន់ ប្រឆាំងនឹងក្រុមផ្សេងនៃសហគមន៍ Druze នៅជនបទភាគខាងលិចនៃខេត្ត Sweida។ ការប្រយុទ្ធគ្នាបានចាប់ផ្តើមបន្ទាប់ពីគ្រាប់កាំភ្លើងត្បាល់ បានធ្លាក់លើតំបន់ដែលស្ថិតនៅក្រោមការគ្រប់គ្រងរបស់សហគមន៍ Druze។

ក្រុមអ្នកសង្កេតការណ៍បានឲ្យដឹងថា ការបាញ់ផ្លោងក្រោយមក បានត្រូវចំតំបន់លំនៅឋាន នៅក្នុងទីក្រុង Sweida ដោយបានបង្កឲ្យមានភាពភ័យស្លន់ស្លោ និងការភ័យខ្លាច ក្នុងចំណោមប្រជាជននៅទីនោះ។ ប្រព័ន្ធផ្សព្វផ្សាយរដ្ឋស៊ីរី មិនបានរាយការណ៍ អំពីការប៉ះទង្គិចគ្នា ឬការវាយប្រហារតាមអាកាសរបស់អ៊ីស្រាអែលឡើយ៕