ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងរៀបចំទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍លើកទី៤ ដែលនឹងប្រមូលផ្តុំអ្នកវិទ្យាសាស្ត្រ អ្នកស្រាវជ្រាវ សិស្ស-និស្សិត អ្នកដឹកនាំឧស្សាហកម្ម និងដៃគូអភិវឌ្ឍន៍ ដើម្បីជំរុញកិច្ចសហការ និង ពន្លឿនបរិវត្តកម្មកម្ពុជា ឆ្ពោះទៅរកសេដ្ឋកិច្ចដែលផ្អែកចំណេះដឹង។

 ឯកឧត្តមបណ្ឌិត ហ៊ុល សៀងហេង អនុរដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើង ក្នុងសន្និសីទសារព័ត៌មាន ស្តីពីទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ (STI) លើកទី៤ នៅថ្ងៃទី២០ ខែមីនា ឆ្នាំ២០២៦ នេះ ថា ការបង្កើតទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍នេះ ដើម្បីជំរុញវិស័យពាក់ព័ន្ធទាំងអស់ ក៏ដូចជាការបណ្តុះបណ្តាលធន ធានមនុស្សក្នុងក្របខណ្ឌវិស័យអប់រំ ក៏ដូចជាសហគ្រាស ដើម្បីចាប់យកវិទ្យាសាស្រ្ត បច្ចេកវិទ្យា និងនវានុវត្តន៍ និងប្រព័ន្ធសេវាកម្ម របស់ប្រទេសជាតិទាំងមូល។ ដូច្នេះការរបង្កើតទិវាជាតិនេះ ជាស្មារតីមួយដើម្បីបំផុសសាធារណជនឱ្យមើលឃើញថា វិទ្យាសាស្ត្រ បច្ចេកវិទ្យា និងនវានុវត្តន៍ មានតួនាទីសំខាន់សម្រាប់ជាប្រយោជន៍នៃការអភិវឌ្ឍសង្គម-សេដ្ឋកិច្ច។ 

ឯកឧត្តមបណ្ឌិត បន្តឱ្យដឹងថា ទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍លើកទី៤ នឹងរៀបចំឡើងមានរយៈពេល ៣ ថ្ងៃ ចាប់ពីថ្ងៃទី២៦ ដល់ថ្ងៃទី២៨ ខែមីនា ឆ្នាំ២០២៦ ខាងមុខនេះ ដោយមានជិត ២០០ស្តង់ ដាក់បង្ហាញនូវបច្ចេកវិទ្យាថ្មីៗផ្សេងៗគ្នា។ តាមរយៈទិវាជាតិនេះដែរ ក៏ជាការប្រមូលផ្តុំអ្នកវិទ្យាសាស្ត្រ អ្នកស្រាវជ្រាវ សិស្ស-និស្សិត អ្នកដឹកនាំឧស្សាហកម្ម និងដៃគូអភិវឌ្ឍន៍ ដើម្បីជំរុញកិច្ចសហការ និងពន្លឿនបរិវត្តកម្មកម្ពុជា ឆ្ពោះទៅរកសេដ្ឋកិច្ចដែលផ្អែកលើចំណេះ និងជំនាញ ស្របតាមបរិបថថ្មីៗដែល កំពុងកើតឡើង។

ឯកឧត្តមបណ្ឌិត ហ៊ុល សៀងហេង បញ្ជាក់ថា វិទ្យាសាស្ត្រ បច្ចេកវិទ្យា និងនវានុវត្តន៍ គឺជាតួនាទីស្នូលគ្រប់វិស័យទាំងអស់ ហើយ ជំនាញទាំងនេះធ្វើឱ្យយើងរស់ បម្រើការអភិវឌ្ឍឧស្សាហកម្ម និងធ្វើឱ្យមានឧត្តមានុភាពរបស់កម្ពុជាផងដែរ។ ជាក់ស្តែងការៀបចំទិវា ជាតិវិទ្យាសាស្ត្រ បច្ចេកវិទ្យា និងនវានុវត្តន៍ នារយៈពេលកន្លងមក ទទួលបានការគាំទ្រយ៉ាងខ្លាំងពីវិស័យឯកជន ចំណែកទិវាជាតិ វិទ្យាសាស្ត្រ បច្ចេកវិទ្យា និងនវានុវត្តន៍លើកទី៤នេះ រំពឹងថា នឹងទទួលបានជោគជ័យកាន់តែខ្លាំងបន្ថែមទៀត។ តាមរយៈនេះដែរ ឯកឧត្តមបណ្ឌិត បានអំពាវនាវដល់អាណាព្យាបាល ជូនកូនៗមកមើលដោយផ្ទាល់ ជាពិសេសសិស្ស-និស្សិត និងអ្នកធ្វើអាជីវកម្ម អញ្ជើញចូលរួមឱ្យបានផុលផុស នៅក្នុងមហាព្រឹត្តការណ៍ទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ ដែលត្រូវរៀបចំឡើងនៅ មជ្ឈមណ្ឌលសន្និបាត និងពិព័រណ៍កោះពេជ្រ៕

អត្ថបទ៖ សុន រ៉ាឌី