​បន្ទាប់ពីលទ្ធផលនៃកិច្ចប្រជុំបន្ទាន់របស់ក្រុមប្រឹក្សាជាតិប្រាក់ឈ្នួលអប្បបរមា បានប្រកាស​ថា​នឹង​ផ្តល់ប្រា​ក់ប​ន្ថែម​លើសោហ៊ុយធ្វើដំណើរ និងស្នាក់នៅ ២,៥០ដុល្លារ ក្នុងមួយខែ ក្នុង​អំឡុង​ពេល​មាន​វិបត្តិ​ប្រេង​ឥន្ធនៈជាសកល។ សហជីព និងកម្មកររោងចក្រ បានសម្តែង​ការ​អរគុណ​ជូន​ចំពោះ​ភាគី​ពាក់ព័ន្ធ ដែលតែងតែយកចិត្តទុកដាក់ជានិច្ចក្នុងកា​រ​ជួយ​អន្តរាគមន៍​មក​កាន់​កម្មករ​និយោជិត​។

លោក ជ័យ វត្ថា សហជីពមូលដ្ឋាន នៃសហព័ន្ធសហជីពសម្លេងយុវជនខ្មែរ នៅក្នុង​រោង​ចក្រ​កាត់​ដេរ​សម្លៀក​បំពាក់ ស្ថិតនៅរាជធានីភ្នំពេញ បាននិយាយប្រាប់ព័ត៌មាន ប៊ីធីវី នៅព្រឹកថ្ងៃទី២១ ខែ​មីនា​នេះ​ឱ្យដឹងថា ការបន្ថែមនេះ ទោះបីគិតថាចំនួនតិចប៉ុន្តែជាទឹកចិត្តគឺធំធេងណាស់ ពីព្រោះថា មិន​មែនតែរូបលោកម្នាក់ទេ ពោលគឺកម្មករ កម្មការិនីទាំងអស់ ពិត​ជា​មាន​ការ​សប្បាយ​ចិ​ត្ត​នៅ​ពេល​ឃើញ​មានការយកចិត្តទុកដាក់ពីសំណាក់របស់រាជរដ្ឋាភិបាល ក្នុងការជួយសម្រាល​ទុក្ខ​លំបាក​ដល់​កម្មករនិយោជិត តាមរយៈការ​ចេញ​បទ​បញ្ជា​ឱ្យ​មាន​កិច្ច​ប្រជុំ​បន្ទាន់​ជា​មួយ​ភាគី​ពាក់​ព័ន្ធ​ ដើម្បីស្វែងរកលទ្ធភាពជួយសម្រាលបន្ទុកចំណាយថ្លៃធ្វើដំណើររបស់ពួកគាត់។

ស្រដៀង​គ្នានេះ លោក ផេង ចាន់នឿន កម្មកររោងចក្រកាត់ដេរ ស៊ីជី ក្លូរី ស្ថិតនៅខណ្ឌមានជ័យ រាជ​ធានី​ភ្នំពេញ បានសម្ដែងក្ដីរីករាយ និងបានសម្តែង​ការ​អរគុណ​យ៉ាង​ជ្រាល​ជ្រៅ​ចំ​ពោះរា​ជ​រដ្ឋាភិបាល​ ក៏ដូចជាភាគីពាក់ព័ន្ធ ដែលតែងតែយកចិត្តទុកដាក់ និងអន្តរាគមន៍ទាន់ពេលវេលា ដើម្បី​បន្ធូរបន្ថយបញ្ហាតម្លៃប្រេងឥន្ធនៈឡើងថ្លៃ ដែលអាចជួយសម្រួលដល់ការចំណាយប្រចាំថ្ងៃ ជា​ពិសេសក្នុងស្ថានភាពដែលមនុស្សទូទាំងពិភពលោកកំពុងតែជួបការលំបាកដូចគ្នា ប៉ុន្តែ​រាជ​រដ្ឋាភិបាល និងភាគីនិយោជក បែជាងាក​មក​បន្ថែម​ប្រាក់​ឧបត្ថម្ភ​បណ្តោះ​អាសន្ន​បន្ថែម​ទៀត​ទៅ​ដល់​កម្មករ​និយោជិត។

ក្រោយឆ្លងកាត់កិច្ចប្រជុំពិភាក្សាស្វែងរកដំណោះស្រាយជួយសម្រាលបន្ទុកចំណាយថ្លៃធ្វើដំណើររបស់​កម្មករនិយោជិតក្នុងអំឡុងពេលវិបត្តិប្រេងឥន្ធនៈជាសាកល កាលពីរសៀលថ្ងៃទី២០ ខែមីនា ឆ្នាំ​២០២៦នេះ ក្រុមប្រឹក្សាជាតិប្រាក់ឈ្នួលអប្បបរមា បានឯកភាព​គ្នា​ផ្តល់​ប្រាក់​សោហ៊ុយ​ធ្វើ​ដំណើរ​បណ្តោះអាសន្នចំនួន ២,៥០ដុល្លារអាម៉េរិក ក្នុងមួយខែ ចាប់ពីថ្ងៃទី១ ខែមេសា ឆ្នាំ​២០២៦ បន្ថែមលើប្រាក់សោហ៊ុយធ្វើដំណើរនិងស្នាក់នៅ ដែលសហគ្រាស ក្រុមហ៊ុន រោង​ចក្រ​កំពុង​អនុវត្ត រហូតដល់ស្ថានភាពតម្លៃប្រេងឥន្ធនៈវិលមករកប្រក្រតីភាពវិញ ដើម្បីជួយ​សម្រាល​បន្ទុក​ចំណាយ​ថ្លៃធ្វើដំណើររបស់កម្មករនិយោជិតក្នុងវិស័យវាយនភណ្ឌ កាត់ដេរ ផលិត​ស្បែក​ជើង ​និងផលិតផលធ្វើដំណើរនិងកាបូប។

សូមរម្លឹកទៀតថា កិច្ចប្រជុំបន្ទាន់របស់ក្រុមប្រឹក្សាជាតិប្រាក់ឈ្នួលអប្បបរមានេះ ធ្វើឡើងបន្ទាប់ សម្ដេច​ធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានណែនាំឱ្យ ឯកឧត្តម ហេង សួរ រដ្ឋម​ន្ត្រី​ក្រសួង​ការងារ និងបណ្តុះបណ្តាលវិជ្ជាជីវៈ រៀបចំកិច្ចប្រជុំជាមួយតំណាងភាគីននិយោជក និង​ភាគី​សហជីព ដែលតំណាងកម្មករនិយោជិត ដើម្បីពិនិត្យ​ពិភាក្សា​ស្វែង​រក​លទ្ធភាព​ជួយ​សម្រាល​បន្ទុកចំណាយថ្លៃធ្វើដំណើររបស់កម្មករនិយោជិត ដើម្បីរកដំណោះស្រាយសមរម្យមួយ ដែ​ល​អាច​ជួយ​សម្រាលបន្ទុកថ្លៃធ្វើដំណើររបស់កម្មករនិយោជិតផង និងអាចរក្សាបាន​នូវ​ភាព​ប្រកួត​ប្រជែង​ផង​នៃ​ឧស្សាហកម្មរបស់កម្ពុជាផងដែរ៕ អត្ថបទ៖ ឈិត បូរ៉ាវី