លោក Saad al-Kaabi នាយកប្រតិបត្តិក្រុមហ៊ុន QatarEnergy បាននិយាយថា លោកបានព្រមានមន្ត្រីសហរដ្ឋអាមេរិក និងនាយកប្រតិបត្តិថាមពល អំពីផលប៉ះពាល់នៃការវាយប្រហារដ៏ខ្លាំងក្លារបស់អ៊ីរ៉ង់ លើរោងចក្រប្រេងនិងឧស្ម័ន មុនពេលទីក្រុងតេអេរ៉ង់កំណត់គោលដៅលើទីក្រុងឧស្សាហកម្ម Ras Laffan របស់ប្រទេសកាតា ជារោងចក្រឧស្ម័នធម្មជាតិរាវ (LNG) ធំបំផុតរបស់ពិភពលោក។

នៅក្នុងបទសម្ភាសន៍ជាមួយទីភ្នាក់ងារសារព័ត៌មាន Reuters លោក al-Kaabi បានពន្យល់ថា លោក «តែងតែព្រមាន និងពិភាក្សាជាមួយនាយកប្រតិបត្តិមកពីផ្នែកប្រេង និងឧស្ម័ន ដែលសហការជាមួយយើង ដោយពិភាក្សាជាមួយរដ្ឋមន្ត្រីក្រសួងថាមពលសហរដ្ឋអាមេរិក លោក Chris Wright ដើម្បីព្រមានអំពីផលវិបាកនោះ និងនិយាយថា វាអាចបង្កគ្រោះថ្នាក់ដល់យើង»។

លោក al-Kaabi ជារដ្ឋមន្ត្រីក្រសួងថាមពលរបស់ប្រទេសកាតា បាននិយាយថា «ពួកគេបានដឹងអំពីការគំរាមកំហែងនេះ ហើយខ្ញុំតែងតែរំលឹកដល់ពួកគេស្ទើរតែរាល់ថ្ងៃថា យើងចាំបាច់ត្រូវប្រាកដថា មានភាពអត់ធ្មត់លើរោងចក្រប្រេង និងឧស្ម័ន»។

ចាប់តាំងពីសហរដ្ឋអាមេរិក និងអ៊ីស្រាអែល បានចាប់ផ្តើមសង្គ្រាមរបស់ពួកគេនៅអ៊ីរ៉ង់នៅចុងខែកុម្ភៈ ការវាយប្រហារដោយមីស៊ីល និងយានដ្រូន បានកំណត់គោលដៅលើនាវាដឹកប្រេង រោងចក្រចម្រាញ់ប្រេង និងហេដ្ឋារចនាសម្ព័ន្ធថាមពលសំខាន់ៗផ្សេងទៀត។ ក្នុងការសងសឹកចំពោះការវាយប្រហាររបស់អ៊ីស្រាអែលលើវាលឧស្ម័ន South Pars របស់អ៊ីរ៉ង់ ទីក្រុងតេអេរ៉ង់បានធ្វើការវាយប្រហារជាបន្តបន្ទាប់លើហេដ្ឋារចនាសម្ព័ន្ធថាមពលរដ្ឋឈូងសមុទ្រនៅប្រទេសគុយវ៉ែត អារ៉ាប់រួម និងប្រទេសកាតា។