យោធាអាមេរិកកំពុងដាក់ពង្រាយនាវាចម្បាំងអាចធ្វើប្រតិបត្តិការទាំងលើគោកនិងក្នុងទឹកដ៏ធំមួយគ្រឿង រួមជាមួយកងម៉ារីន និងនាវិករាប់ពាន់នាក់បន្ថែមទៀតទៅកាន់តំបន់មជ្ឈិមបូព៌ា។ នេះបើយោងតាមមន្ត្រីអាមេរិកបីរូបដែលបាននិយាយទៅកាន់ទីភ្នាក់ងារសារព័ត៌មានរ៉យទ័រកាលពីថ្ងៃសុក្រ។ មន្ត្រីពីររូបបាននិយាយថា ពុំទាន់មានការសម្រេចចិត្តណាមួយត្រូវបានធ្វើឡើងដើម្បីបញ្ជូនកងទ័ពចូលទៅក្នុងប្រទេសអ៊ីរ៉ង់នោះទេ ប៉ុន្តែពួកគេនឹងបង្កើនសមត្ថភាពសម្រាប់ប្រតិបត្តិការនាពេលអនាគតដ៏មានសក្តានុពល នៅក្នុងតំបន់នោះ។

សេតវិមានបានបញ្ជូនសំណួរទៅកាន់មន្ទីរបញ្ចកោណ ដែលមិនទាន់បានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។ ទីភ្នាក់ងារសារព័ត៌មានរ៉យទ័រ បានរាយការណ៍កាលពីដើមសប្តាហ៍នេះថា ទីក្រុងវ៉ាស៊ីនតោន ដែលចង់បើកច្រកសមុទ្រ Hormuz ឡើងវិញ កំពុងពិចារណាការដាក់ពង្រាយរហូតដល់ រួមទាំងការចូលចត។ ទោះជាយ៉ាងណា លោក Trump បានប្រាប់អ្នកសារព័ត៌មានថា លោកមិនដាក់កងទ័ព «នៅកន្លែងណាទេ»។

ប្រភពព័ត៌មានដែលបាននិយាយក្នុងលក្ខខណ្ឌមិនបញ្ចេញឈ្មោះ មិនបាននិយាយពីតួនាទីរបស់កងទ័ពបន្ថែមនោះទេ។ ការដាក់ពង្រាយបន្ថែមនេះ នឹងបន្ថែមទៅលើកងទ័ពអាមេរិកចំនួន ៥០.០០០នាក់ដែលមានស្រាប់នៅតំបន់មជ្ឈិមបូព៌ា។ កាលពីថ្ងៃសុក្រ លោក Trump បានបញ្ចេញកំហឹងរបស់លោកទៅលើសម្ព័ន្ធមិត្តអាមេរិកម្តងទៀត ដោយសរសេរនៅលើបណ្តាញសង្គមថា ពួកគេជា «មនុស្សកំសាក» ដែលបានបដិសេធមិនជួយបើកច្រកសមុទ្រ Hormuz ខណៈការប្រយុទ្ធនៅតែបន្ត។