ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃសុក្រ ទី២០ ខែមីនា ថា គ្មានមេដឹកនាំណាម្នាក់នៅប្រទេសអ៊ីរ៉ង់ដែលនៅសល់ដើម្បីចរចាជាមួយអំពីសង្គ្រាមនោះទេ ដោយការវាយប្រហាររបស់យោធានៅតែបន្តកំណត់គោលដៅលើមន្ត្រីអ៊ីរ៉ង់។

លោក Trump បាននិយាយក្នុងអំឡុងពេលថ្លែងសុន្ទរកថានៅក្នុងព្រឹត្តិការណ៍នៅសេតវិមានថា មេដឹកនាំរបស់ពួកគេ បានស្លាប់អស់ហើយ។ ក្រុមមេដឹកនាំបន្ទាប់ក៏នឹងស្លាប់ដែរ ហើយក្រុមមេដឹកនាំបន្ទាប់ភាគច្រើននឹងស្លាប់។ ពេលនេះ គ្មាននរណាម្នាក់ចង់ក្លាយជាមេដឹកនាំនៅទីនោះទៀតទេ។ យើងកំពុងជួបពេលវេលាដ៏លំបាក។ យើងចង់ចរចាជាមួយពួកគេ ហើយគ្មានអ្នកណាត្រូវចរចាជាមួយទេ។ យើងគ្មានអ្នកណាត្រូវចរចាជាមួយឡើយ។ 

នៅក្នុងសុន្ទរកថាដដែលនោះ លោកបានកំណត់លក្ខណៈអំពីកិច្ចខិតខំប្រឹងប្រែងរបស់សហរដ្ឋអាមេរិកនៅអ៊ីរ៉ង់ថា «ដំណើរការទៅដោយរលូន»។ ការថ្លែងរបស់លោក បានធ្វើឡើងនៅពេលដែលតម្លៃប្រេងបានកើនឡើង១ភាគរយនៅក្នុងការជួញដូរដែលប្រែប្រួលកាលពីថ្ងៃសុក្រ ខណៈសង្គ្រាមនៅអ៊ីរ៉ង់រយៈពេលបីសប្តាហ៍មិនបង្ហាញសញ្ញានៃការថមថយឡើយ ដោយសហរដ្ឋអាមេរិកកំពុងត្រៀមបញ្ជូនកងទ័ពបន្ថែមរាប់ពាន់នាក់ទៅកាន់តំបន់មជ្ឈិមបូព៌ានៅសប្តាហ៍ខាងមុខ។