ភ្នំពេញ៖ ព្រឹទ្ធសភាកម្ពុជា សម្តែងនូវការខកចិត្ត និងសោកស្តាយបំផុត ចំពោះសេចក្តីសម្រេចរបស់សភាអឺរ៉ុប ដែលទាមទារឲ្យកម្ពុជាទម្លាក់ការចោទក្រុមអតីតមេដឹកនាំ និងសកម្មជនប្រឆាំង ព្រមទាំងមន្រ្តីសង្គមស៊ីវិល ដែលបានរំលោភបំពានច្បាប់កន្លងមក ខណៈការចោទប្រកាន់របស់តុលាការកម្ពុជា នាពេលកន្លងទៅ គឺបានធ្វើឡើងដោយផ្អែកលើមូលដ្ឋានអង្គហេតុ (ភស្តុតាងរឹងមាំ) និងស្របតាមច្បាប់ជាធរមានរបស់កម្ពុជានោះ។
យោងតាមសេចក្តីថ្លែងការណ៍របស់ព្រឹទ្ធសភាកម្ពុជា នារសៀលថ្ងៃទី១៧ ខែមីនា ឆ្នាំ២០២១នេះ បានលើកឡើងថា ព្រឹទ្ធសភានៃព្រះរាជាណាចក្រកម្ពុជា សូមសម្តែងនូវការខកចិត្ត និងសោកស្តាយបំផុតចំពោះសេចក្តីសម្រេចរបស់សភាអឺរ៉ុប នៅថ្ងៃទី១១ ខែមីនា ឆ្នាំ២០២១ ស្តីពីការជំនុំជម្រះក្តីប្រឆាំងនិងជនល្មើសច្បាប់នៅកម្ពុជា (២០២១/២៥៧៩(RSP)។
សេចក្តីថ្លែងការណ៍ បានលើកឡើងទៀតថា សេចក្តីសម្រេចនេះ ធ្វើឡើងដោយគ្មានមូលដ្ឋានច្បាប់ មានចរិតលំអៀង និងក្រោមហេតុផលនយោបាយ និងលើកទឹកចិត្តឱ្យក្រុមឧក្រិដ្ឋជនប្រឆាំងជាមួយរាជរដ្ឋាភិបាលស្របច្បាប់ តាមរយៈការបម្រើ របៀបវារៈនយោបាយរបស់បរទេសប្រឆាំងជាតិឯង។
សេចក្តីថ្លែងការណ៍ របស់ព្រឹទ្ធសភាដដែលបានសង្កត់ធ្ងន់ថា« ការទាមទារឱ្យទម្លាក់ការចោទប្រកាន់លើជនជាប់ចោទ និងលុបចោលការផ្តន្ទាទោស និងការកាត់ទោសជនល្មើសដោយតុលាការកម្ពុជា គឺជាការជ្រៀតជ្រែកចូលកិច្ចការផ្ទៃក្នុងរបស់កម្ពុជា ដែលជារដ្ឋអធិបតេយ្យ និងជាការរំលោភលើឯករាជ្យភាពរបស់តុលាការកម្ពុជា ដែលមិនអាចជ្រៀតជ្រែកបានជាដាច់ខាត។
ការជំនុំជម្រះក្តីលើបុគ្គលដែលជាអតីតមេដឹកនាំ និងសកម្មជនប្រឆាំង ព្រមទាំងមន្រ្តីសង្គមស៊ីវិលដែលបានរំលោភបំពានច្បាប់កន្លងមក ត្រូវបានធ្វើឡើងដោយផ្អែកលើមូលដ្ឋានអង្គហេតុ (ភស្តុតាងរឹងមាំ) និងស្របតាមច្បាប់ជាធរមានរបស់កម្ពុជា។
សិទ្ធិរបស់ជនជាប់ចោទក្នុងការការពារខ្លួន នីតិវិធីសវនាការប្រព្រឹត្តទៅត្រឹមត្រូវ ធានាយ៉ាងពេញលេញដោយច្បាប់ ហើយការជំនុំជម្រះត្រូវបានធ្វើឡើងជាសាធារណៈ ដោយមានវត្តមានមេធាវីការពារចុងចោទ អង្គទូត និងអង្គការសង្គមស៊ីវិល នៅក្នុងបន្ទប់សវនាការ ដូចគ្នាទៅនឹងប្រទេសប្រជាធិបតេយ្យដទៃទៀតដែរ ការអនុវត្តច្បាប់ទៅលើបុគ្គល ដែលប្រើប្រាស់សិទ្ធិសេរីភាពហួសដែនកំណត់ដោយច្បាប់ ដែលធ្វើឱ្យប៉ះពាល់ធ្ងន់ធ្ងរដល់សណ្តាប់ធ្នាប់សាធារណៈ និងសន្តិសុខជាតិ មិនត្រូវចាត់ទុកជាការរឹតត្បិតខាងនយោបាយ ឬលំហប្រជាធិបតេយ្យនោះទេ»។
ជាមួយគ្នានោះដែរ ព្រឹទ្ធសភាកម្ពុជា ក៏បានអះអាងផងដែរថា ព្រះរាជាណាចក្រកម្ពុជា ប្តេជ្ញាបន្តគោរពគោលការណ៍នីតិរដ្ឋ ប្រជាធិបតេយ្យ សេរីពហុបក្ស និងធានានូវការអនុវត្តសិទ្ធិសេរីភាពទាំងឡាយ ស្របតាមរដ្ឋធម្មនុញ្ញ និងច្បាប់ជាធរមាន ដើម្បីរក្សាសន្តិភាព ស្ថិរភាព និងសុខុមាលភាពរបស់ប្រជាជន៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
