ក្រុមអ្នកជួយសង្គ្រោះកូរ៉េខាងត្បូង នៅថ្ងៃសៅរ៍ (ទី២១ ខែមីនា ឆ្នាំ២០២៦) បានរកឃើញសាកសពមនុស្សយ៉ាងតិចចំនួន ១០នាក់ ពីគំនរបាក់បែកនៃរោងចក្រគ្រឿងបន្លាស់រថយន្តមួយកន្លែង នៅទីក្រុង Daejeon ភាគកណ្តាល ជាកន្លែងដែលអគ្គិភ័យទំនងបណ្តាលមកពីការផ្ទុះ បានធ្វើឲ្យមនុស្សយ៉ាងហោចណាស់ ៥៩នាក់ផ្សេងទៀត រងរបួស និង ៤នាក់ទៀតបាត់ខ្លួន។

ក្រសួងមហាផ្ទៃ និងសុវត្ថិភាព បានឲ្យដឹងថា មនុស្ស ២៥នាក់ បានរងរបួសធ្ងន់ធ្ងរ ប៉ុន្តែមន្ត្រីមិនបានបញ្ជាក់ភ្លាមៗនោះឡើយថា តើមាននរណាម្នាក់ស្ថិតក្នុងស្ថានភាពគំរាមកំហែងដល់អាយុជីវិតដែរ ឬអត់។

មន្ត្រីម្នាក់មកពីនាយកដ្ឋានគ្រប់គ្រងអគ្គិភ័យ និងគ្រោះមហន្តរាយផ្សេងទៀតរបស់ក្រសួងមហាផ្ទៃ បានប្រាប់សារព័ត៌មាន AFP ថា៖ «គិតត្រឹមម៉ោង ៥ ព្រឹកនេះ យើងដឹងថា មនុស្ស ១០នាក់បានបាត់បង់ជីវិត ២៥នាក់ រងរបួសធ្ងន់ធ្ងរ ហើយ ៤នាក់នៅតែបាត់ខ្លួន»។ លោកបានបន្ថែមថា៖ «យើងក៏ដឹងផងដែរថាមនុស្ស ៣៤នាក់ បានរងរបួស ប៉ុន្តែមិនស្ថិតក្នុងស្ថានភាពធ្ងន់ធ្ងរទេ"។

អ្នកពន្លត់អគ្គិភ័យ នគរបាល និងបុគ្គលិកសង្គ្រោះបន្ទាន់ជាង ៥០០នាក់ ត្រូវបានដាក់ពង្រាយ ដើម្បីទប់ស្កាត់អគ្គិភ័យនេះ និងធ្វើប្រតិបត្តិការជួយសង្គ្រោះ បន្ទាប់ពីអណ្ដាតភ្លើងបានឆាបឆេះឡើង កាលពីរសៀលថ្ងៃសុក្រ។

ការស្វែងរកកម្មករដែលបាត់ខ្លួន បានចាប់ផ្តើមនៅយប់ថ្ងៃសុក្រ បន្ទាប់ពីមន្ត្រីបានដាក់ពង្រាយមនុស្សយន្តពន្លត់អគ្គិភ័យដែលគ្មានអ្នកបញ្ជា ដើម្បីធ្វើឲ្យរចនាសម្ព័ន្ធត្រជាក់ និងបានធ្វើការត្រួតពិនិត្យសុវត្ថិភាព។ អគ្គិភ័យត្រូវបានរាយការណ៍នៅម៉ោងប្រហែល ១:១៨រសៀល (ម៉ោងក្នុងស្រុក)។ យោងតាមទីភ្នាក់ងារសារព័ត៌មាន Yonhap របស់កូរ៉េខាងត្បូង បានឲ្យដឹងថា មានកម្មករសរុបចំនួន ១៧០នាក់ នៅក្នុងរោងចក្រ នៅពេលដែលអគ្គិភ័យបានចាប់ផ្តើមកើតមាន៕