យោធាអ៊ីស្រាអែលបានវាយប្រហារអ៊ីរ៉ង់ និងទីក្រុងបេរូតរបស់លីបង់ នៅថ្ងៃសៅរ៍ (ទី២១ ខែមីនា ឆ្នាំ២០២៦) នេះ ខណៈដែលសហរដ្ឋអាមេរិកកំពុងបញ្ជូនកងម៉ារីនរាប់ពាន់នាក់បន្ថែមទៀតទៅកាន់តំបន់មជ្ឈិមបូព៌ា ហើយប្រធានាធិបតី លោក Donald Trump បានចោទប្រកាន់សម្ព័ន្ធមិត្តណាតូថា ទន់ជ្រាយ ដែលមានភាពរារែក ក្នុងការជួយបើកច្រកសមុទ្រ Hormuz។

មនុស្សមិនតិចជាង ២.០០០នាក់ ត្រូវបានសម្លាប់ ចាប់តាំងពីសហរដ្ឋអាមេរិក និងអ៊ីស្រាអែល បានបើកការវាយប្រហារលើអ៊ីរ៉ង់ កាលពីថ្ងៃទី២៨ ខែកុម្ភៈ ខណៈដែលពលរដ្ឋអាមេរិក ហាក់ដូចជាមានកង្វល់កាន់តែខ្លាំងឡើងៗ ចំពោះសញ្ញាដែលថា សង្គ្រាមអាចពង្រីកបន្ថែមទៀត នៅពេលដែលវាឈានចូលដល់សប្តាហ៍ទី៤។

អ៊ីស្រាអែលបានបញ្ជាក់ថា នាថ្ងៃសៅរ៍នេះ ខ្លួនកំពុងវាយប្រហារក្រុមហេសបូឡា នៅក្នុងរដ្ឋធានីលីបង់ ខណៈដែលខ្លួនបានបង្កើនការវាយប្រហារតាមអាកាស ដែលផ្តោតលើកងជីវពលគាំទ្រដោយអ៊ីរ៉ង់មួយនេះ ជាការវាយប្រហារដ៏ខ្លាំងក្លាបំផុត ដែលរាលដាលពីសង្គ្រាមលើអ៊ីរ៉ង់ ចាប់តាំងពីក្រុមហេសបូឡា បានបាញ់ទៅលើអ៊ីស្រាអែល ដើម្បីគាំទ្រទីក្រុងតេអេរ៉ង់ កាលពីថ្ងៃទី២ ខែមីនា។ យោធារបស់អ៊ីស្រាអែល បានបន្ថែម ថា អ៊ីស្រាអែលក៏បានបើកការវាយប្រហារថ្មីលើអ៊ីរ៉ង់ នៅថ្ងៃសៅរ៍នេះ ក្នុងនោះរួមមានទាំងរដ្ឋធានីតេអេរ៉ង់ផងដែរ។

គួរដឹងថា ហេដ្ឋារចនាសម្ព័ន្ធថាមពលដ៏សំខាន់ នៅក្នុងប្រទេសអ៊ីរ៉ង់ និងរដ្ឋឈូងសមុទ្រជិតខាង ក៏ត្រូវបានវាយប្រហារផងដែរ ហើយតម្លៃប្រេងបានហក់ឡើង ៥០ភាគរយ ចាប់តាំងពីសង្គ្រាមបានចាប់ផ្តើមឡើង ដែលគំរាមកំហែងដល់សេដ្ឋកិច្ចពិភពលោក។

ច្រកសមុទ្រ Hormuz ដែលជាផ្លូវសម្រាប់ផ្គត់ផ្គង់ប្រេង និងឧស្ម័នធម្មជាតិរាវទូទាំងពិភពលោកប្រហែល ១ភាគ៥ ត្រូវបានបិទយ៉ាងមានប្រសិទ្ធភាព ចំពោះការដឹកជញ្ជូនភាគច្រើន ចាប់តាំងពីសហរដ្ឋអាមេរិក និងអ៊ីស្រាអែលបានចាប់ផ្តើមសង្គ្រាមលើអ៊ីរ៉ង់។ 

មន្ត្រីអាមេរិក ៣រូប បានប្រាប់សារព័ត៌មាន Reuters កាលពីថ្ងៃសុក្រថា កងម៉ារីនចំនួន ២.៥០០នាក់ រួមជាមួយនាវាចម្បាំង Boxer និងនាវាចម្បាំងអមដំណើរ នឹងដាក់ពង្រាយទៅកាន់តំបន់មជ្ឈិមបូព៌ា ទោះបីជាពួកគេមិន បានបញ្ជាក់ថា ពួកគេនឹងមានតួនាទីធ្វើអ្វីក៏ដោយ៕