កាលពីថ្ងៃសុក្រ (ទី២០ ខែមីនា ឆ្នាំ២០២៦) ក្រសួងការបរទេសរុស្ស៊ីបានកោះអញ្ជើញឯកអគ្គរដ្ឋទូតអ៊ីស្រាអែល លោក Oded Joseph ហើយបានដាក់ការតវ៉ាយ៉ាងខ្លាំង ចំពោះការវាយប្រហារតាមអាកាសរបស់កងកម្លាំងអ៊ីស្រាអែល ដែលកំណត់គោលដៅលើអ្នកសារព័ត៌មាននៃប្រព័ន្ធផ្សព្វផ្សាយ RT របស់រុស្ស៊ី នៅប្រទេសលីបង់។

នៅពេលដែលត្រូវបានអ្នកសារព័ត៌មានសួរ មុនពេលចូលទៅក្នុងអគារក្រសួងការបរទេស នៅទីក្រុងមូស្គូ អ្នកការទូតរូបនេះបានបដិសេធមិនឆ្លើយសំណួរឡើយ ដោយនិយាយថា លោក «មិនចង់យឺតពេល សម្រាប់កិច្ចប្រជុំ»។

បន្ទាប់ពីបញ្ចប់កិច្ចប្រជុំជាមួយឯកអគ្គរដ្ឋទូតអ៊ីស្រាអែល ក្រសួងបានចេញសេចក្តីថ្លែងការណ៍មួយដោយប្រាប់ឲ្យដឹងថា អនុរដ្ឋមន្ត្រីការបរទេស លោក Georgy Borisenko បានបង្ហាញការតវ៉ាយ៉ាងខ្លាំង ចំពោះលោក Joseph ពាក់ព័ន្ធនឹងការវាយប្រហារនេះ។

ក្រសួងបានបញ្ជាក់ថា៖ «ភាគីរុស្ស៊ីបានដាក់ការតវ៉ាផ្លូវការ ទាក់ទងនឹងការបាញ់ផ្លោង លើសមាជិកនៃក្រុមប្រព័ន្ធផ្សព្វផ្សាយ RT ដែលបានរងរបួស ដោយសារការវាយប្រហារដោយមីស៊ីល ពីសំណាក់កងទ័ពអាកាសអ៊ីស្រាអែល នៅភាគខាងត្បូងនៃប្រទេសលីបង់»។

ក្រសួងបានឲ្យដឹងទៀតថា លោក Borisenko បានស្នើសុំ «ឲ្យមានការស៊ើបអង្កេតយ៉ាងហ្មត់ចត់ អំពីស្ថានភាពនៃឧប្បត្តិហេតុនេះ និងដើម្បីទប់ស្កាត់ការអនុវត្តបែបនេះ នាពេលអនាគត»។ ជាមួយគ្នានេះ ក្រសួងបានបន្ថែមថា អ្នកការទូតទាំង២ ក៏បានពិភាក្សាអំពីស្ថានភាពយោធា-នយោបាយដ៏តានតឹង នៅក្នុងតំបន់មជ្ឈិមបូព៌ាផងដែរ។

គួរបញ្ជាក់ថា កាលពីថ្ងៃព្រហស្បតិ៍ សមាជិកនៃក្រុមការងាររបស់ប្រព័ន្ធផ្សព្វផ្សាយ RT ដែលកំពុងបំពេញការងារផ្នែកវិចារណកថា នៅភាគខាងត្បូងប្រទេសលីបង់ បានរងរបួសដោយសារការវាយប្រហារតាមអាកាសរបស់អ៊ីស្រាអែល៕