ដោយដកស្រង់សម្តីពីមន្ត្រីអាមេរិក សារព័ត៌មាន The Wall Street Journal (WSJ) កាលពីថ្ងៃសុក្រ (ទី២០ ខែមីនា ឆ្នាំ២០២៦) បានរាយការណ៍ថា អ៊ីរ៉ង់ទើបតែបានបាញ់មីស៊ីលបាលីស្ទិក ២គ្រាប់ ទៅកាន់មូលដ្ឋានយោធារួម រវាងសហរដ្ឋអាមេរិក និងចក្រភពអង់គ្លេស នៅមូលដ្ឋាន Diego Garcia ក្នុងមហាសមុទ្រឥណ្ឌា។

របាយការណ៍នេះ បានបញ្ជាក់ថា មិនមីស៊ីលណាមួយ បានបាញ់ចំគោលដៅ ដែលមានចម្ងាយប្រហែល ៤.០០០គីឡូម៉ែត្រ ពីទឹកដីអ៊ីរ៉ង់នោះទេ ប៉ុន្តែការបាញ់បង្ហោះនេះ បង្ហាញថា ទីក្រុងតេអេរ៉ង់ មានមីស៊ីលដែលមានចម្ងាយឆ្ងាយជាងការគិតពីមុន។ មន្ទីរបញ្ចកោណមិនបានឆ្លើយតបភ្លាមៗឡើយ ចំពោះសំណើរបស់សារព័ត៌មាន AFP សម្រាប់ការសុំការអត្ថាធិប្បាយ។

សារព័ត៌មាន WSJ បានបន្ថែមថា មីស៊ីលមួយគ្រាប់ មិនដំណើរការទេ ហើយមួយទៀត ត្រូវបានកំណត់គោលដៅដោយប្រព័ន្ធស្ទាក់ចាប់ដែលបាញ់ចេញពីនាវាចម្បាំងអាមេរិក តែគេមិនច្បាស់នោះទេថា តើមីស៊ីលនោះត្រូវបានវាយប្រហារដែរ ឬអត់។

មូលដ្ឋាន Diego Garcia នៅកោះ Chagos គឺជាមួយ ក្នុងចំណោមមូលដ្ឋាន ២ ដែលចក្រភពអង់គ្លេសកំពុងអនុញ្ញាតឲ្យសហរដ្ឋអាមេរិកប្រើប្រាស់ សម្រាប់ប្រតិបត្តិការ «ការពារ» នៅអ៊ីរ៉ង់។

កងកម្លាំងអាមេរិក បានដាក់យន្តហោះទម្លាក់គ្រាប់បែក និងគ្រឿងយុទ្ធោបករណ៍ផ្សេងទៀតឈរជើង នៅមូលដ្ឋាននេះ ដែលជាមជ្ឈមណ្ឌលសំខាន់ សម្រាប់ប្រតិបត្តិការអាស៊ី រួមទាំងយុទ្ធនាការទម្លាក់គ្រាប់បែករបស់សហរដ្ឋអាមេរិក នៅអាហ្វហ្គានីស្ថាន និងអ៊ីរ៉ាក់ផងដែរ៕