រដ្ឋបាលរបស់លោកប្រធានាធិបតីអាមេរិក Donald Trump បានអនុញ្ញាតឲ្យក្រុមហ៊ុនប្រេងខ្ចីប្រេងឆៅចំនួន ៤៥,២លានបារ៉ែល ពីការបម្រុងប្រេងយុទ្ធសាស្ត្រ (SPR) ជាការប៉ុនប៉ង ដើម្បីគ្រប់គ្រងតម្លៃដែលបានហក់ឡើងដល់កម្រិតខ្ពស់បំផុតជាលើកដំបូង ក្នុងរយៈពេល ៤ឆ្នាំ ដោយសារតែការធ្វើសង្គ្រាមលើអ៊ីរ៉ង់។

ការបញ្ចេញក្រុមដំបូង គ្របដណ្តប់កម្រិត ៥២ភាគរយនៃចំនួនរហូតដល់ ៨៦លានបារ៉ែល ដែលរដ្ឋបាលនេះបានប្រកាសកាលពីសប្តាហ៍មុនថា ខ្លួនមានគម្រោងឲ្យខ្ចី។ នៅទីបំផុត សហរដ្ឋអាមេរិកមានគោលបំណងឲ្យខ្ចីចំនួន ១៧២លានបារ៉ែល សម្រាប់ការដឹកជញ្ជូនពេញមួយឆ្នាំ២០២៦ និងឆ្នាំបន្ទាប់។

ក្រសួងថាមពល បានឲ្យដឹងនៅក្នុងសេចក្តីថ្លែងការណ៍មួយថា ក្រុមហ៊ុនដែលទទួលបានការឲ្យខ្ចី SPR ដំបូង រួមមាន BP Products North America, Gunvor USA, Marathon Petroleum និង Shell Trading។

ការឲ្យខ្ចីទាំងនេះ គឺជាផ្នែកមួយនៃកិច្ចព្រមព្រៀងជាមួយប្រទេសចំនួន ៣២ នៅក្នុងទីភ្នាក់ងារថាមពលអន្តរជាតិ ដើម្បីបញ្ចេញប្រេងចំនួន ៤០០លានបារ៉ែលពីការស្តុកបម្រុងរបស់ពួកគេ។ 

ក្រុមហ៊ុនទាំងនោះ នឹងសងប្រេងត្រលប់វិញដោយមានកម្រិតបារ៉ែលលើសជាបុព្វលាភ ជាប្រព័ន្ធមួយដែលក្រសួងថាមពលបញ្ជាក់ថា មានបំណងធ្វើឲ្យទីផ្សារមានស្ថិរភាព «ដោយមិនប៉ះពាល់ដល់ប្រាក់របស់អ្នកបង់ពន្ធអាមេរិក»។

សង្គ្រាមដែលបានចាប់ផ្តើមដោយសហរដ្ឋអាមេរិក និងអ៊ីស្រាអែលកាលពីថ្ងៃទី២៨ ខែកុម្ភៈ បានជំរុញឲ្យតម្លៃប្រេងឆៅហក់ឡើងដល់កម្រិតខ្ពស់បំផុត គិតចាប់តាំងពីការចាប់ផ្តើមការឈ្លានពានរបស់រុស្ស៊ី លើអ៊ុយក្រែន៕