ភ្នំពេញ ៖ រដ្ឋាភិបាលកូរ៉េ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) គ្រោងសាងសង់អគារព្យាបាលជំងឺថ្មីមួយ ដែលមានកម្ពស់៥ជាន់តម្លៃ១៦លានដុល្លារអាមេរិក នៅក្នុងមន្ទីរពេទ្យកុមារជាតិ ដើម្បីជួយសម្រួលក្នុងការព្យាបាលជំងឺជូនដល់កុមារកាន់តែប្រសើរឡើងថែមទៀត។

​នាឱកាសជួបសំណេះសំណាល និងពិភាក្សាការងារនៅមនី្ទរពេទ្យកុមារជាតិ ថ្ងៃទី២៩ ខែមីនា ឆ្នាំ២០២២នេះ រវាងលោកសាស្រ្តាចារ្យ ញឹប អង្គាបុស្ស នាយកមនី្ទរពេទ្យកុមារជាតិ ជាមួយលោកស្រី អ៊ីម ចុងហ៊ី អនុប្រធានទីភ្នាក់ងារសហប្រតិបតិ្តការអន្តរជាតិកូរ៉េ (កយកា-KOICA) រួមនឹងថ្នាក់ដឹកនាំរបស់មនី្ទរពេទ្យ។ លោកសាស្រ្តាចារ្យ ញឹប អង្គាបុស្ស បានឲ្យដឹងថា អគារព្យាបាលជំងឺថ្មីបន្ថែមទៀត គឺមានកម្ពស់៥ជាន់ដែលមានទំហំជាង៨៣០០ម៉ែត្រការ៉េ ដោយចំណាយថវិកាក្នុងដំណើរការសាងសង់ប្រមាណ១៦លានដុល្លារអាមេរិក ដែលជាការចំណាយដ៏ធំជាងគេបំផុតនៅកម្ពុជាតាំងពីប្រទេសកម្ពុជាមានកិច្ចសហប្រតិបត្តិការជាមួយរដ្ឋាភិបាលកូរ៉េ។ សព្វថ្ងៃ គម្រោងនេះភាគីទាំងពីរបានបញ្ចប់ការសិក្សាលំអិតនឹងបានអនុម័តថវិការួចរាល់ បន្តទៅមុខទៀត គឺឈានដល់ដំណាក់កាលគូសប្លង់សាងសង់បន្ទាប់មកទៀតមានការដេញថ្លៃហើយតាមផែនការគ្រោងទុក នឹងសាងសង់នៅដើមឆ្នាំ២០២៣ ដោយប្រើរយៈពេល៣ឆ្នាំនៃការសាងសង់អគារព្យាបាលជំងឺថ្មីនេះ។

លោកសាស្ត្រាចារ្យ ញឹប អង្គាបុស្ស បានបញ្ជាក់ថា អគារព្យាបាលជំងឺថ្មីនេះមានផ្នែកពិគ្រោះជំងឺក្រៅតាមឯកទេសនីមួយៗ មានអាហារដ្ឋាន កន្លែងក្មេងលេង និងមានបង្កើតសេវាកម្មថែទាំសុខភាពថ្មីៗជូនដល់កុមាររួមមាន ជំងឺត្រចៀក ច្រមុះ បំពង់ក ភ្នែក តម្រង់នោម ក្រពេញក្នុង ម៉ាស៊ីនលាងឈាមផ្នែកកុមារ ជំងឺមហារីកឈាម សួត ក្រពះពោះវៀន ម៉ាស៊ីនថតឆ្លុះក្រពះទងសួត និងជំងឺអូទីសឹម។ ក្នុងអគារថ្មីនេះ យើងអាចដាក់គ្រែបានចំនួន១៦៩គ្រែនិងមានកន្លែងសម្រាប់បណ្តុះបណ្តាលនិងការអនុវត្តផ្ទាល់ដល់ក្រុមការងារគ្រូពេទ្យផ្នែកជំនាញកុមារ មកពីតាមបណ្តារាជធានី-ខេត្ត។ ហើយនេះគឺជាអគារព្យាបាលជំងឺទី២ ដែលរដ្ឋាភិបាលកូរ៉េជួយសាងសង់ដល់មន្ទីរពេទ្យកុមារជាតិខណៈអគារទី១កូរ៉េបានសាងសង់រួចរាល់ និងបានដាក់្យដំណើរការរួចហើយដែលមានកម្ពស់៣ជាន់។ លោកសាស្រ្តាចារ្យ ក៏សូមថ្លែងអំណរគុណចំពោះរដ្ឋាភិបាល និងប្រជាជនកូរ៉េ ដែលបានផ្តល់ជំនួយឧបត្ថម្ភជាបន្តបន្ទាប់ដល់មនី្ទរពេទ្យកុមារជាតិ។

តមកលោកស្រីបណ្ឌិត អ៊ីម ចុងហ៊ី អនុប្រធានទីភ្នាក់ងារសហប្រតិបត្តិការអន្តរជាតិកូរ៉េ និងលោក សាស្ត្រាចារ្យ ញឹប អង្គាបុស្ស នាយកមន្ទីរពេទ្យកុមារជាតិ រួមនឹងថ្នាក់ដឹកនាំ បានចុះត្រួតពិនិត្យសមិទ្ធផលនានារបស់រដ្ឋាភិបាលកូរ៉េ៕​អត្ថបទ ៖ រដ្ឋា