ក្រុមពាណិជ្ជករ បាននិយាយនៅថ្ងៃសៅរ៍ (ទី២១ ខែមីនា ឆ្នាំ២០២៦) នេះថា ក្រុមហ៊ុនចម្រាញ់ប្រេងឥណ្ឌា មានគម្រោងបន្តទិញប្រេងអ៊ីរ៉ង់ ខណៈដែលក្រុមហ៊ុនចម្រាញ់ប្រេង នៅកន្លែងផ្សេងទៀត នៅតំបន់អាស៊ី កំពុងពិនិត្យមើលចំណាត់ការបែបនេះ បន្ទាប់ពីទីក្រុងវ៉ាស៊ីនតោន បានលុបចោលទណ្ឌកម្មជាបណ្តោះអាសន្ន ដើម្បីកាត់បន្ថយវិបត្តិថាមពល ជាអ្វីដែលបណ្តាលមកពីសង្គ្រាមរបស់សហរដ្ឋអាមេរិក និងអ៊ីស្រាអែល លើអ៊ីរ៉ង់។

ប្រភពចម្រាញ់ប្រេងឥណ្ឌាចំនួន ៣ បានប្រាប់ឲ្យដឹងថា ពួកគេនឹងទិញប្រេងអ៊ីរ៉ង់ ហើយកំពុងរង់ចាំការណែនាំពីរដ្ឋាភិបាល និងភាពច្បាស់លាស់ពីទីក្រុងវ៉ាស៊ីនតោន ជុំវិញព័ត៌មានលម្អិត ដូចជាលក្ខខណ្ឌទូទាត់ជាដើម។ ក្រុមហ៊ុនចម្រាញ់ប្រេង នៅឥណ្ឌា ដែលមានស្តុកប្រេងឆៅតិចជាងក្រុមហ៊ុននាំចូលប្រេងធំៗ នៅអាស៊ីផ្សេងទៀត បានប្រញាប់ប្រញាល់កក់ប្រេងរបស់រុស្ស៊ី បន្ទាប់ពីសហរដ្ឋអាមេរិកបានលើកលែងទណ្ឌកម្មបណ្តោះអាសន្ន។

ជាមួយគ្នានេះដែរ បុគ្គលជាច្រើនដែលដឹងអំពីបញ្ហានេះ បានបង្ហើបឲ្យដឹងថា ក្រុមហ៊ុនចម្រាញ់ប្រេងអាស៊ីផ្សេងទៀត កំពុងធ្វើការត្រួតពិនិត្យ ដើម្បីមើលថា តើពួកគេអាចទិញប្រេងបានដែរ ឬអត់។ រដ្ឋមន្ត្រីក្រសួងរតនាគារអាមេរិក លោក Scott Bessent បាននិយាយថា រដ្ឋបាលរបស់លោកប្រធានាធិបតី Donald Trump បានចេញការលើកលែងទណ្ឌកម្មរយៈពេល ៣០ថ្ងៃ កាលពីថ្ងៃទី២០ ខែមីនា សម្រាប់ការទិញប្រេងអ៊ីរ៉ង់ដែលកំពុងស្ថិតនៅក្នុងសមុទ្ររួចហើយ។

បើយោងតាមការិយាល័យគ្រប់គ្រងទ្រព្យសម្បត្តិបរទេស បានឲ្យដឹងថា ការលើកលែងនេះអនុវត្តចំពោះតែប្រេងដែលផ្ទុកនៅលើនាវាណាមួយ ក្នុងនោះរួមមានទាំងនាវាដឹកប្រេងដែលត្រូវបានអនុម័តនៅ ឬមុនថ្ងៃទី២០ ខែមីនានិងត្រូវបានបញ្ចេញនៅថ្ងៃទី១៩ ខែមេសា។ នេះជាលើកទី៣ ហើយ ដែលសហរដ្ឋអាមេរិកបានលើកលែងទណ្ឌកម្មជាបណ្តោះអាសន្នលើប្រេង ចាប់តាំងពីមានការចាប់ផ្តើមនូវសង្គ្រាមនេះ៕