វិមានក្រឹមឡាំង នៅថ្ងៃសៅរ៍ (ទី២១ ខែមីនា ឆ្នាំ២០២៦) បានប្រាប់ឲ្យដឹងថា ប្រធានាធិបតីរុស្ស៊ី លោក Vladimir Putin បានសម្ដែងការអបអរទៅកាន់មេដឹកនាំអ៊ីរ៉ង់ នៅថ្ងៃបុណ្យ Nowruz (បុណ្យចូលឆ្នាំថ្មីពែរ្ស) ហើយបានបញ្ជាក់ថា ទីក្រុងមូស្គូនៅតែជាមិត្តដ៏ស្មោះត្រង់ និងជាដៃគូដែលអាចទុកចិត្តបាន សមា្រប់ទីក្រុងតេអេរ៉ង់។

តែយ៉ាងណាក្ដី វិសាលភាពនៃការគាំទ្ររបស់ទីក្រុងមូស្គូ ចំពោះអ៊ីរ៉ង់ កំពុងស្ថិតក្នុងភាពប្រទាំងប្រទើស។ ប្រភពព័ត៌មានអ៊ីរ៉ង់មួយចំនួន បានលើកឡើងថា ពួកគេទទួលបានជំនួយពិតប្រាកដតិចតួចពីទីក្រុងមូស្គូ ក្នុងអំឡុងពេលអ៊ីរ៉ង់កំពុងជួបប្រទះវិបត្តិដ៏ធំបំផុត ចាប់តាំងពីព្រះមហាក្សត្រ Shah ដែលគាំទ្រដោយសហរដ្ឋអាមេរិក ត្រូវបានទម្លាក់ពីរាជបល្ល័ង្ក នៅក្នុងបដិវត្តន៍ឆ្នាំ១៩៧៩។

វិមានក្រឹមឡាំងបានឲ្យដឹងថា លោក Putin បានផ្ញើការអបអរសាទរទៅកាន់មេដឹកនាំកំពូលអ៊ីរ៉ង់ លោក Mojtaba Khamenei និងប្រធានាធិបតីអ៊ីរ៉ង់ លោក Masoud Pezeshkian នៅថ្ងៃចូលឆ្នាំថ្មីរបស់អ៊ីរ៉ង់។ វិមានក្រឹមឡាំងបានឲ្យដឹងថា៖ «លោក Vladimir Putin បានជូនពរប្រជាជនអ៊ីរ៉ង់ជម្នះលើបញ្ហាប្រឈមដ៏លំបាកនេះ ដោយសេចក្តីថ្លៃថ្នូរ ហើយបានសង្កត់ធ្ងន់ថា នៅក្នុងគ្រាលំបាកនេះ ទីក្រុងមូស្គូនៅតែជាមិត្តស្មោះត្រង់ និងជាដៃគូដែលអាចទុកចិត្តបានរបស់ទីក្រុងតេអេរ៉ង់»។

ប្រទេសរុស្ស៊ី លើកឡើងថា ការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ បានរុញឲ្យតំបន់មជ្ឈិមបូព៌ាទាំងមូលធ្លាក់ចូលទៅក្នុងវិបត្តិកាន់តែធ្ងន់ធ្ងរ និងបង្កឲ្យមានវិបត្តិថាមពលសកលដ៏ធំមួយ ខណៈពេលដែលមេដឹកនាំកំពូលអ៊ីរ៉ង់ លោក Ali Khamenei ត្រូវបានធ្វើឃាតដោយឥតក្ដីមេត្តា។

សារព័ត៌មាន Politico បានរាយការណ៍ថា ទីក្រុងមូស្គូបានស្នើឲ្យក្រុងវ៉ាស៊ីនតោនធ្វើដូចគ្នា ដោយប្រាប់ថា វិមានក្រឹមឡាំងនឹងឈប់ចែករំលែកព័ត៌មានស៊ើបការណ៍សម្ងាត់ជាមួយអ៊ីរ៉ង់ ប្រសិនបើទីក្រុងវ៉ាស៊ីនតោនឈប់ផ្គត់ផ្គង់ព័ត៌មានស៊ើបការណ៍សម្ងាត់ដល់អ៊ុយក្រែន អំពីរុស្ស៊ី ប៉ុន្តែសហរដ្ឋអាមេរិកបានបដិសេធគំនិតនេះ។ វិមានក្រឹមឡាំងបានច្រានចោលរបាយការណ៍នេះថា ជាព័ត៌មានក្លែងក្លាយ៕