ប្រទេសអ៊ីរ៉ង់ត្រៀមរួចហើយ ក្នុងការអនុញ្ញាតឲ្យនាវាដែលមានទំនាក់ទំនងជាមួយជប៉ុន ឆ្លងកាត់ច្រកសមុទ្រ Hormuz ដែលជាសរសៃឈាមដ៏សំខាន់ សម្រាប់ការផ្គត់ផ្គង់ប្រេងសកល។ នេះបើយោងតាមសេចក្ដីរាយការណ៍របស់សារព័ត៌មាន Kyodo ដោយដកស្រង់សម្តីរដ្ឋមន្ត្រីការបរទេសអ៊ីរ៉ង់ លោក Abbas Araqchi។

នៅក្នុងបទសម្ភាសន៍តាមទូរស័ព្ទកាលពីថ្ងៃសុក្រ (ទី២០ ខែមីនា ឆ្នាំ២០២៦) លោក Araqchi បានប្រាប់ទីភ្នាក់ងារសារព័ត៌មានជប៉ុននេះថា ទីក្រុងតេអេរ៉ង់បានចាប់ផ្តើមការចរចាជាមួយទីក្រុងតូក្យូ ក្នុងនោះរួមទាំងជាមួយរដ្ឋមន្ត្រីការបរទេស លោក Toshimitsu Motegi អំពីលទ្ធភាពដែលអាចបើកច្រកសមុទ្រនេះ។

នៅថ្ងៃសៅរ៍ ក្រសួងការបរទេស និងពាណិជ្ជកម្មរបស់ជប៉ុន និងការិយាល័យនាយករដ្ឋមន្ត្រី មិនបានលើកទូរស័ព្ទនោះឡើយ នៅពេលសារព័ត៌មាន Reuters ទាក់ទងទៅ ដើម្បីសុំការអត្ថាធិប្បាយ ជុំវិញរបាយការណ៍នោះ។

នៅក្នុងបទសម្ភាសន៍នោះ លោក Araqchi បានប្រាប់សារព័ត៌មាន Kyodo ថា៖ «ជាការពិតណាស់ អ៊ីរ៉ង់ត្រៀមរួចជាស្រេចហើយ ដើម្បីគាំទ្រការឆ្លងកាត់នាវាដែលមានទំនាក់ទំនងនឹងជប៉ុន ឆ្លងកាត់ច្រកសមុទ្រ Hormuz ប្រសិនបើជប៉ុនស្វែងរកការបើកច្រកសមុទ្រឡើងវិញ»។

ប្រទេសជប៉ុនមានប្រហែល ៩០ភាគរយនៃការដឹកជញ្ជូនប្រេងរបស់ខ្លួន តាមរយៈច្រកសមុទ្រនេះ ដែលទីក្រុងតេអេរ៉ង់ភាគច្រើនបានបិទ ក្នុងអំឡុងពេលមានសង្គ្រាមសហរដ្ឋអាមេរិក-អ៊ីស្រាអែល លើអ៊ីរ៉ង់។ ការឡើងតម្លៃប្រេងសកលបង្កឡើងដោយសង្គ្រាមនេះ ដែលបានឈនចូលដល់សប្តាហ៍ទី៤ នៅថ្ងៃសៅរ៍នេះ បានជំរុញឲ្យជប៉ុន និងប្រទេសដទៃទៀតបញ្ចេញប្រេងពីការស្តុកបម្រុងរបស់ខ្លួន៕