ប្រភពចំនួន ២ បានឲ្យដឹងថា ក្រុមប្រឹក្សាសន្តិភាព (Board of Peace) របស់លោក Donald Trump បានបង្ហាញសំណើជាលាយលក្ខណ៍អក្សរដល់ក្រុមហាម៉ាស អំពីថា តើពួកគេអាចរំសាយអាវុធដោយរបៀបណា ជាជំហានមួយដែលក្រុមសកម្មប្រយុទ្ធប៉ាឡេស្ទីនមួយនេះ បានបដិសេធមិនអនុវត្ត ខណៈដែលប្រធានាធិបតីអាមេរិក កំពុងជំរុញផែនការរបស់លោក សម្រាប់អនាគតរបស់តំបន់ហ្កាហ្សា។

ប្រភពមួយបានប្រាប់ថា សំណើនេះ ដែលត្រូវបានរាយការណ៍ដំបូងដោយសារព័ត៌មាន NPR ត្រូវបានដាក់ទៅក្រុមហាម៉ាស ក្នុងអំឡុងពេលមានកិច្ចប្រជុំ នៅទីក្រុងគែរ ប្រទេសអេហ្ស៊ីប កាលពីសប្តាហ៍មុន។ ប្រភព២ ដែលដឹងពីបញ្ហានេះ បានបញ្ជាក់ថា កិច្ចពិភាក្សានេះ មានការចូលរួមពីលោក Nickolay Mladenov និងលោក Aryeh Lightstone។ លោក Mladenov គឺជាបេសកជនក្រុមប្រឹក្សាសន្តិភាព ដែលត្រូវបានតែងតាំងដោយលោក Trump ប្រចាំតំបន់ហ្កាហ្សា។ ចំណែកលោក Lightstone គឺជាជំនួយការសហរដ្ឋអាមេរិកនៃបេសកជនពិសេសរបស់លោក Trump គឺលោក Steve Witkoff។

ផែនការតំបន់ហ្កាហ្សារបស់លោក Trump ដែលអ៊ីស្រាអែល និងក្រុមហាម៉ាស បានព្រមព្រៀងគ្នាកាលពីខែតុលា ឃើញថា កងទ័ពអ៊ីស្រាអែលត្រូវដកចេញពីតំបន់ហ្កាហ្សា ហើយការកសាងឡើងវិញចាប់ផ្តើម ខណៈដែលក្រុមហាម៉ាសត្រូវរំសាយអាវុធ។

តាមរយៈសារលើបណ្ដាញសង្គម X សម្រាប់ថ្ងៃបុណ្យមូស្លីម Eid al-Fitr លោក Mladenov បានរៀបរាប់ថា៖ «ឥឡូវនេះ វាកំពុងស្ថិតក្នុងដំណើការពិភាក្សា។ វាតម្រូវឲ្យមានជម្រើសច្បាស់លាស់មួយ ដែលនោះគឺការរំសាយអាវុធទាំងស្រុងរបស់ក្រុមហាម៉ាស និងក្រុមប្រដាប់អាវុធទាំងអស់ ដោយគ្មានករណីលើកលែង និងមិនមានករណីពិសេសអ្វីឡើយ។ ក្នុងអំឡុងពេលពេញទៅដោយក្តីសង្ឃឹមនេះ សូមឲ្យអ្នកដែលត្រូវទទួលខុសត្រូវ ធ្វើការជ្រើសរើសដ៏ត្រឹមត្រូវ សម្រាប់ប្រជាជនប៉ាឡេស្ទីន»។

តំណាងក្រុមហាម៉ាសមិនអាចទាក់ទងសុំការអត្ថាធិប្បាយភ្លាមៗបានឡើយ នៅថ្ងៃសៅរ៍នេះ ដែលជាថ្ងៃទី២ នៃថ្ងៃឈប់សម្រាក។ ការចរចា ស្តីពីការរំសាយអាវុធ ត្រូវបានផ្អាកនៅពេលមានការចាប់ផ្តើមសង្គ្រាមរបស់សហរដ្ឋអាមេរិក និងអ៊ីស្រាអែល លើអ៊ីរ៉ង់ ដែលបានផ្ទុះឡើងងកាលពីថ្ងៃទី២៨ ខែកុម្ភៈ៕