យោងតាមការអះអាងរបស់ប្រមុខអង្គការសុខភាពពិភពលោក(WHO)លោក Tedros Adhanom Ghebreyesus បានឲ្យដឹងថា ការវាយប្រហារលើមន្ទីរពេទ្យ ស្ថិតក្នុងតំបន់ Darfur របស់ប្រទេសស៊ូដង់ បានសម្លាប់មនុស្សយ៉ាងហោច ៦៤នាក់ រួមទាំងកុមារ ១៣នាក់ផងដែរ ។

នៅក្នុងសារបង្ហោះលើបណ្តាញព័ត៌មានសង្គមកាលពីថ្ងៃសៅរ៍ លោក Tedros និយាយថា អ្នកជំងឺជាច្រើននាក់ គិលានុបដ្ឋាយិកា ២នាក់ និងវេជ្ជបណ្ឌិតម្នាក់ ស្ថិតនៅក្នុងចំណោមមនុស្សដែលត្រូវបានសម្លាប់ នៅក្នុងការវាយប្រហារកាលពីយប់ថ្ងៃសុក្រ លើមន្ទីរពេទ្យ Al Deain ស្ថិតក្នុងទីក្រុង Al Deain ដែលជារដ្ឋធានីរដ្ឋ East Darfur ។

លោកបន្តថា មនុស្ស ៨៩នាក់ផ្សេងទៀត រួមទាំងបុគ្គលិកមន្ទីរពេទ្យ ៨នាក់ផងដែរ បានរងរបួស ។ ការវាយប្រហារនេះបណ្តាលឲ្យខូចខាតផ្នែកកុមារ ផ្នែកសម្ភព និងផ្នែកសង្គ្រោះបន្ទាន់ ។

លោក Tedros និយាយទៀតថា លទ្ធផលនៃសោកនាដកម្មនេះ គ្រោះថ្នាក់ដល់អាយុជីវិតពាក់ព័ន្ធនឹងការវាយប្រហារលើទីតាំងសុខភាព អំឡុងសង្រ្គាមស៊ូដង់ បច្ចុប្បន្នបានកើនឡើងជាង ២ពាន់នាក់ ។

លោកថា អំឡុងសង្រ្គាមជិត ៣ឆ្នាំរវាងកងទ័ពស៊ូដង់ និងកងកម្លាំងគាំទ្ររហ័ស(RSF) ការវាយប្រហារ ២១៣លើកលើទីតាំងសុខភាព បណ្តាលឲ្យមនុស្ស ២.០៣៦នាក់ស្លាប់ ៕