តំណាងអ៊ីរ៉ង់ ប្រចាំទីភ្នាក់ងារសមុទ្រនៃអង្គការសហប្រជាជាតិ បាននិយាយនៅថ្ងៃអាទិត្យ (២២ មីនា) នេះថា ច្រកសមុទ្រហ័រមូស នៅតែបើកចំហសម្រាប់នាវាដឹកជញ្ជូនទាំងអស់ លើកលែងតែនាវាទាំងឡាយណាដែលមានការពាក់ព័ន្ធនឹង «សត្រូវរបស់អ៊ីរ៉ង់» បន្ទាប់ពីប្រធានាធិបតីអាមេរិក លោក Donald Trump បានគំរាមវាយប្រហារលើរោងចក្រអគ្គិសនីរបស់អ៊ីរ៉ង់ ប្រសិនបើផ្លូវទឹកនេះមិនត្រូវបាន «បើកចំហពេញលេញ» ក្នុងរយៈពេល ៤៨ ម៉ោងទេនោះ។

ការគំរាមកំហែងនៃការវាយប្រហាររបស់ទីក្រុងតេអេរ៉ង់ ក្នុងអំឡុងសង្រ្គាមរវាងអាមេរិក-អ៊ីស្រាអែល លើប្រទេសអ៊ីរ៉ង់ បានធ្វើឱ្យនាវាភាគច្រើនមិនហ៊ានឆ្លងកាត់ច្រកសមុទ្រដ៏តូចចង្អៀតនេះឡើយ ដែលជាច្រកឆ្លងកាត់សម្រាប់ប្រហែលមួយភាគប្រាំនៃប្រេង និងការផ្គត់ផ្គង់ឧស្ម័នធម្មជាតិរាវសកល ដែលកំពុងគំរាមកំហែងដល់វិបត្តិថាមពលពិភពលោក។

លោក Ali Mousavi បាននិយាយថា ទីក្រុងតេអេរ៉ង់ បានត្រៀមខ្លួនរួចជាស្រេចក្នុងការសហការជាមួយអង្គការដែនសមុទ្រអន្តរជាតិ (IMO) ដើម្បីកែលម្អសុវត្ថិភាពសមុទ្រ និងការពារនាវិកនៅក្នុងតំបន់ឈូងសមុទ្រ ដោយបន្ថែមថា នាវាដែលមិនពាក់ព័ន្ធនឹង «សត្រូវរបស់អ៊ីរ៉ង់» អាចឆ្លងកាត់ច្រកសមុទ្របាន ដោយធ្វើការសម្របសម្រួលលើការរៀបចំសន្តិសុខ និងសុវត្ថិភាពជាមួយទីក្រុងតេអេរ៉ង់។

លោក Mousavi បានបន្តថា៖ «ការទូតនៅតែជាអាទិភាពរបស់អ៊ីរ៉ង់។ ទោះជាយ៉ាងណាក៏ដោយ ការបញ្ឈប់ការឈ្លានពានទាំងស្រុង ក៏ដូចជាការជឿទុកចិត្ត និងទំនុកចិត្តរវាងគ្នាទៅវិញទៅមក គឺមានសារៈសំខាន់ជាង» ដោយលោកបានបន្ថែមថា ការវាយប្រហាររបស់អ៊ីស្រាអែល និងសហរដ្ឋអាមេរិក ប្រឆាំងនឹងអ៊ីរ៉ង់ គឺជា «ឫសគល់នៃស្ថានភាពបច្ចុប្បន្ននៅក្នុងច្រកសមុទ្រហ័រមូស»៕