កាលពីថ្ងៃសៅរ៍ (២១ មីនា) ក្រុមអ្នកតវ៉ាបានប្រមូលផ្តុំគ្នានៅទីក្រុងឡុងដ្រ៍ របស់ចក្រភពអង់គ្លេស ប្រឆាំងនឹងការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់ ដែលនាំឱ្យមានភាពតានតឹងនៅមជ្ឈិមបូព៌ា និងជំរុញឱ្យតម្លៃថាមពលសកលកើនឡើង។ នៅអាល្លឺម៉ង់ ការតវ៉ាទ្រង់ទ្រាយធំបានផ្ទុះឡើងនៅទីក្រុងប៊ែរឡាំង កាលពីថ្ងៃសៅរ៍ដដែលនេះ ខណៈក្រុមបាតុករបានថ្កោលទោសការវាយប្រហារយោធាលើអ៊ីរ៉ង់ និងបានអំពាវនាវឱ្យមានការសន្ទនា និងការទូតដើម្បីដោះស្រាយជម្លោះ។

នៅទីក្រុងឡុងដ្រ៍ ហ្វូងបាតុករស្រែកឃ្លាតវ៉ា និងកាន់បដាដែលសរសេរថា «ឈប់ទម្លាក់គ្រាប់បែកលើអ៊ីរ៉ង់» ហើយក្រុមបាតុករបានជំរុញឱ្យមានបទឈប់បាញ់ និងការចរចាដោយសន្តិវិធី។ នៅទីក្រុងប៊ែរឡាំង ហ្វូងមនុស្សមកពីគ្រប់មជ្ឈដ្ឋានទូទាំងអាល្លឺម៉ង់ បានប្រមូលផ្តុំគ្នានៅកណ្តាលទីក្រុង គ្រវីបដា និងស្រែកពាក្យតវ៉ា ដោយសម្តែងការប្រឆាំងយ៉ាងខ្លាំងចំពោះសកម្មភាពយោធារបស់សហរដ្ឋអាមេរិក និងអ៊ីស្រាអែលថ្មីៗនេះប្រឆាំងនឹងអ៊ីរ៉ង់។

ក្តីបារម្ភអំពីថាមពលក៏ជាចំណុចសំខាន់មួយនៃបាតុកម្មទាំងនេះដែរ។ ក្រុមអ្នកវិភាគនិយាយថា ជាមួយនឹងភាពតានតឹងកាន់តែខ្លាំងឡើងនៅមជ្ឈិមបូព៌ា ភាពប្រែប្រួលនៃទីផ្សារថាមពលបានកើនឡើង ហើយការពឹងផ្អែករបស់អឺរ៉ុបលើថាមពលរបស់សហរដ្ឋអាមេរិក ក៏កាន់តែកើនឡើងផងដែរ។

មួយថ្ងៃមុនការជួបជុំនៅទីក្រុងឡុងដ្រ៍ រដ្ឋាភិបាលអង់គ្លេសបានអនុម័តឱ្យអាមេរិក ប្រើមូលដ្ឋានរបស់ខ្លួនសម្រាប់ប្រតិបត្តិការដែលមានបំណងបំផ្លាញទីតាំងមីស៊ីល និងសមត្ថភាពដែលប្រើដើម្បីវាយប្រហារនាវាក្នុងច្រកសមុទ្រហ័រមូស ដែលជាច្រកដឹកប្រេងមួយភាគប្រាំរបស់ពិភពលោក។ ជំហាននេះបានបង្កឱ្យមានភាពចម្រូងចម្រាសនៅក្នុងស្រុក ដោយក្រុមអ្នកតវ៉ាជាច្រើនព្រមានថា ការធ្វើបែបនោះនឹងអូសទាញចក្រភពអង់គ្លេស ឱ្យចូលកាន់តែជ្រៅទៅក្នុងជម្លោះ និងបង្កើនហានិភ័យសន្តិសុខ៕