ប្រធានាធិបតី លោក Volodymyr Zelenskiy បាននិយាយកាលពីថ្ងៃអាទិត្យ ទី២២ ខែមីនា ថា គណៈប្រតិភូអ៊ុយក្រែន និងសហរដ្ឋអាមេរិក បានបញ្ចប់ការចរចាថ្ងៃទីពីរនៅរដ្ឋ Florida ស្តីពីការស្វែងរកមធ្យោបាយដើម្បីបញ្ចប់សង្គ្រាមរយៈពេលបួនឆ្នាំជាមួយរុស្ស៊ី។ អ្នកតំណាងរុស្ស៊ី ពុំមានវត្តមាននៅក្នុងកិច្ចចរចា ដែលបានបើកនៅរដ្ឋ Florida ទេ។ ដំបូងឡើយ ពួកគេត្រូវបានគេរំពឹងថានឹងចូលរួមក្នុងការចរចា ដែលត្រូវបានគ្រោងទុកធ្វើឡើងនៅទីក្រុង Abu Dhabi ។

ក្រុមអ្នកចរចាអាមេរិក បានដឹកនាំដោយបេសកជនពិសេស លោក Steve Witkoff និង លោក Jared Kushner កូនប្រសាររបស់លោកប្រធានាធិបតី Donald Trump។ លោក Zelenskyy បាននិយាយនៅក្នុងសុន្ទរកថាមួយថា «វាច្បាស់ណាស់ថា ការយកចិត្តទុកដាក់របស់ភាគីអាមេរិកនៅពេលនេះ គឺផ្តោតជាចម្បងលើស្ថានភាពជុំវិញប្រទេសអ៊ីរ៉ង់ និងតំបន់ដ៏ទូលំទូលាយ ប៉ុន្តែសង្គ្រាមរបស់រុស្ស៊ីប្រឆាំងអ៊ុយក្រែនក៏ត្រូវតែបញ្ចប់ផងដែរ»។ លោកបាននិយាយថា «មានការចង្អុលបង្ហាញថា ការដោះដូរឈ្លើយសឹកសង្គ្រាមបន្ថែមទៀតអាចកើតឡើង ដែលពិតជាដំណឹងល្អ និងជាការបញ្ជាក់ថា ផ្នែកការទូតកំពុងដំណើរការ ហើយយើងសង្ឃឹមថារឿងនេះនឹងសម្រេចបាន»។

កាលពីថ្ងៃអាទិត្យ លោកបានជំរុញឱ្យសម្ព័ន្ធមិត្តរក្សាសម្ពាធទណ្ឌកម្មលើប្រទេសរុស្ស៊ី និងបានអំពាវនាវឱ្យមានចំណាត់ការកាន់តែតឹងរ៉ឹងប្រឆាំងអ្វីដែលគេហៅថាកងនាវាដឹកប្រេងស្រមោលរបស់រុស្ស៊ីដែលត្រូវបានប្រើប្រាស់ដើម្បីបញ្ចៀសទណ្ឌកម្ម និងសម្រាប់ទីក្រុងមូស្គូត្រូវតែបានបដិសេធសម្រាប់ប្រាក់ចំណូលពីប្រេង។ លោកបាននិយាយបន្ថែមថា «កងនាវាស្រមោលរបស់រុស្ស៊ី មិនត្រូវបានគិតថាមានសុវត្ថិភាពទេនៅក្នុងដែនទឹកអឺរ៉ុប ឬកន្លែងផ្សេងទៀត។ នាវាដឹកប្រេងដែលបម្រើឲ្យថវិកាសម្រាប់សង្គ្រាមត្រូវតែបញ្ឈប់ ឬត្រូវតែបានរារាំង មិនត្រូវអនុញ្ញាតនោះទេ»។ ទីក្រុងវ៉ាស៊ីនតោន បានដកចេញជាបណ្តោះអាសន្នទណ្ឌកម្មមួយចំនួនលើប្រេងរបស់រុស្ស៊ី ដើម្បីជួយទប់ទល់នឹងកង្វះការផ្គត់ផ្គង់ដែលបណ្តាលមកពីសង្គ្រាមនៅអ៊ីរ៉ង់។ ផែនការសន្តិភាពដែលកំពុងត្រូវបានជំរុញដោយសហរដ្ឋអាមេរិក នឹងតម្រូវឱ្យមានការបោះឆ្នោតប្រធានាធិបតីនៅអ៊ុយក្រែន រួមជាមួយនឹងការផ្តល់សម្បទានទឹកដី។ លោក Zelenskiy ដែលអាណត្តិរបស់លោកបានផុតកំណត់រួចហើយនោះ កំពុងស្ថិតនៅក្រោមសម្ពាធជាថ្មីពីលោក Trump ដើម្បីធ្វើការបោះឆ្នោត ខណៈទីក្រុងវ៉ាស៊ីនតោនជំរុញទីក្រុងគីវឆ្ពោះទៅរកកិច្ចព្រមព្រៀងសន្តិភាព។