ផ្សារភាគហ៊ុនបានធ្លាក់ចុះនៅអាស៊ីនៅថ្ងៃចន្ទ ២៣ មីនានេះ ខណៈទិន្នផលមូលបត្របំណុលរបស់សហរដ្ឋអាមេរិកបានឡើងដល់កម្រិតកំពូលក្នុងរយៈពេលប្រាំបីខែ ស្របពេលសហរដ្ឋអាមេរិក និងអ៊ីរ៉ង់បានគំរាមកំហែងដាក់គ្នាកាន់តែខ្លាំងឡើង ហើយអ៊ីស្រាអែល គ្រោងទុកសម្រាប់ការប្រយុទ្ធគ្នា ច្រើនសប្តាហ៍ បន្ថែមទៀត ដែលធ្វើឱ្យតម្លៃប្រេងធ្លាក់ចុះតិចតួច។ 

អ៊ីរ៉ង់បាននិយាយកាលពីថ្ងៃអាទិត្យថា ខ្លួននឹងវាយប្រហារប្រព័ន្ធថាមពល និងទឹករបស់ប្រទេសជិតខាងឈូងសមុទ្រ ប្រសិនបើប្រធានាធិបតីអាមេរិក Donald Trump បន្តគំរាមកំហែងវាយប្រហារបណ្តាញអគ្គិសនីរបស់អ៊ីរ៉ង់ក្នុងរយៈពេល៤៨ ម៉ោង ដោយបញ្ចប់ក្តីសង្ឃឹមណាមួយនៃការបញ្ឈប់សង្គ្រាមឲ្យបានឆាប់ ដែលឥឡូវនេះសង្គ្រាមស្ថិតនៅក្នុងសប្តាហ៍ទីបួនហើយ។

សន្ទស្សន៍ភាគហ៊ុន Nikkei របស់ជប៉ុនបានធ្លាក់ចុះ ៤,៧ ភាគរយ ដែលនាំមកនូវការខាតបង់សម្រាប់ខែមីនារហូតមកដល់ពេលនេះដល់ជាង១៣ ភាគរយ។ ទីផ្សារភាគហ៊ុនរបស់កូរ៉េខាងត្បូងបានធ្លាក់ចុះ៦,២ ភាគរយ ដែលធ្វើឱ្យធ្លាក់ចុះសម្រាប់ ១២ភាគរយសម្រាប់ខែនេះ។ សន្ទស្សន៍ទូលំទូលាយបំផុតរបស់ MSCI នៃភាគហ៊ុនអាស៊ីប៉ាស៊ីហ្វិកនៅខាងក្រៅប្រទេសជប៉ុនបានធ្លាក់ចុះ ១,៩ ភាគរយ។

ទាំងសន្ទស្សន៍ blue-chip CSI300 របស់ប្រទេសចិន និងសន្ទស្សន៍ Shanghai Composite បានបាត់បង់ប្រហែល ២ ភាគរយនៅពេលបើកការជួញដូរ។

រីឯសន្ទស្សន៍ភាគហ៊ុន Hang Seng របស់ទីក្រុង ហុងកុង វិញ បានធ្លាក់ចុះជិត ៣ ភាគរយ។

សម្រាប់អឺរ៉ុបវិញ ភាគហ៊ុន EUROSTOXX 50 និងភាគហ៊ុន DAX បានធ្លាក់ចុះ១,២ភាគរយ ។ចំណែកផ្សារភាគហ៊ុនអាមេរិក Wall Streetនិងភាគហ៊ុន S&P 500 បានធ្លាក់ចុះ០,១ភាគរយ ខណៈដែលផ្សារភាគហ៊ុន Nasdaq បានធ្លាក់ចុះ០,២ភាគរយ៕