ប្រភពដែលដឹងពីបញ្ហានេះបានប្រាប់សារព័ត៌មានរ៉យទ័រនៅថ្ងៃចន្ទ (២៣ មីនា) នេះថា ក្រុមហ៊ុន Saudi Aramco ដែលជាស្ថាប័ននាំចេញប្រេងធំជាងគេក្នុងពិភពលោករបស់អារ៉ាប៊ីសាអ៊ូឌីត បានកាត់បន្ថយការផ្គត់ផ្គង់ប្រេងឆៅដល់អ្នកទិញនៅអាស៊ី សម្រាប់ខែទីពីរនៅក្នុងខែមេសា ខាងមុខនេះ បន្ទាប់ពីសង្រ្គាមរវាងសហរដ្ឋអាមេរិក-អ៊ីស្រាអែល ជាមួយអ៊ីរ៉ង់ បានរំខានដល់ការធ្វើពាណិជ្ជកម្មតាមរយៈច្រកសមុទ្រហ័រមូសដ៏សំខាន់។

ប្រភពបាននិយាយថា ក្រុមហ៊ុននេះកំពុងផ្គត់ផ្គង់តែប្រេងឆៅប្រភេទ Arab Light ប៉ុណ្ណោះ ដែលនាំចេញពីកំពង់ផែសមុទ្រក្រហមនៃទីក្រុង Yanbu ទៅកាន់អតិថិជនដែលមានកិច្ចសន្យារយៈពេលវែងក្នុងខែមេសា ដែលធ្វើឱ្យការផ្គត់ផ្គង់ដល់រោងចក្រចម្រាញ់ប្រេងនៅអាស៊ីរងភាពតានតឹង និងដាក់កម្រិតលើទិន្នផលផលិតផលចម្រាញ់របស់ពួកគេ។

យ៉ាងណាក៏ដោយ ក្រុមហ៊ុន Aramco មិនទាន់អត្ថាធិប្បាយបានភ្លាមៗជុំវិញការកាត់បន្ថយនេះទេ។ ទិន្នន័យពីក្រុមហ៊ុនវិភាគ Kpler បានបង្ហាញថា អារ៉ាប៊ីសាអ៊ូឌីតបាននាំចេញប្រេងឆៅចំនួន ៤,៣៥៥ លានបារ៉ែលក្នុងមួយថ្ងៃមកទល់ពេលនេះក្នុងខែមីនានេះ ដែលធ្លាក់ចុះពីចំនួន ៧,១០៨ លានបារ៉ែលក្នុងមួយថ្ងៃកាលពីខែកុម្ភៈ។

ក្រុមហ៊ុននេះកំពុងព្យាយាមបង្កើនការនាំចេញប្រេងឆៅតាមរយៈទីក្រុង Yanbu ដើម្បីប៉ះប៉ូវការរំខាននៅច្រកសមុទ្រហ័រមូស ដោយការដឹកជញ្ជូនត្រូវបានមើលឃើញថាកើនឡើងដល់កម្រិតកំណត់ត្រាក្នុងខែមីនា។ ក្រុមហ៊ុនចម្រាញ់ប្រេងឈានមុខគេរបស់ចិន Sinopec ក៏គ្រោងដឹកជញ្ជូនប្រេងឆៅរបស់អារ៉ាប៊ីសាអ៊ូឌីតប្រហែល ២៤ លានបារ៉ែលពីទីក្រុង Yanbu ក្នុងខែមីនានេះផងដែរ៕