ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃចន្ទ (២៣ មីនា) នេះថា មេដឹកនាំកូរ៉េខាងជើង លោក គីម ជុងអ៊ុន ត្រូវបានតែងតាំងជាប្រធានកិច្ចការរដ្ឋឡើងវិញ បន្ទាប់ពីប្រទេសផ្ដាច់ខ្លួនមួយនេះបានបើកសម័យប្រជុំលើកដំបូងនៃសភាប្រជាជនកំពូលរបស់ខ្លួនកាលពីថ្ងៃអាទិត្យកន្លងទៅ។

កិច្ចប្រជុំនៅក្នុងទីក្រុងព្យុងយ៉ាង មានប្រធានបទពិភាក្សាអំពីវិសោធនកម្ម និងការបំពេញបន្ថែមលើរដ្ឋធម្មនុញ្ញសង្គមនិយម ក៏ដូចជាការបោះឆ្នោតជ្រើសរើសប្រធានគណៈកម្មាធិការកិច្ចការរដ្ឋ និងស្ថាប័នដឹកនាំរដ្ឋផ្សេងៗទៀត។

សភាកូរ៉េខាងជើង ដែលជាស្ថាប័ននីតិប្បញ្ញត្តិ «ប្រថាប់ត្រា» របស់ទីក្រុងព្យុងយ៉ាង ជាអ្នកអនុម័តជាផ្លូវការលើគោលនយោបាយរដ្ឋ ហើយភាគច្រើនជួបប្រជុំគ្នាបន្ទាប់ពីសមាជរបស់បក្សពលករដែលកំពុងកាន់អំណាច ដើម្បីប្រែក្លាយការសម្រេចចិត្តរបស់បក្ស ឱ្យទៅជាច្បាប់ពេញលេញ។ ប្រព័ន្ធផ្សព្វផ្សាយKCNA បានឱ្យដឹងថា កិច្ចប្រជុំនេះក៏នឹងពិនិត្យឡើងវិញនូវផែនការសេដ្ឋកិច្ចប្រាំឆ្នាំរបស់ប្រទេស ដែលបានប្រកាសនៅក្នុងសមាជបក្សលើកទីប្រាំបួន កាលពីខែកុម្ភៈផងដែរ។

ការចាប់អារម្មណ៍ត្រូវបានផ្តោតទៅលើថា តើទីក្រុងព្យុងយ៉ាង នឹងធ្វើវិសោធនកម្មរដ្ឋធម្មនុញ្ញរបស់ខ្លួន ដើម្បីដាក់បញ្ចូលគោលនយោបាយ «រដ្ឋអរិភាពពីរ» របស់មេដឹកនាំ គីម ជុងអ៊ុន ចំពោះកូរ៉េខាងត្បូងជាផ្លូវការដែរឬទេ។ ក្នុងប៉ុន្មានឆ្នាំចុងក្រោយនេះ លោក គីម បានបោះបង់គោលដៅដែលមានតាំងពីយូរយារណាស់មកហើយរបស់ទីក្រុងព្យុងយ៉ាង ក្នុងការបង្រួបបង្រួមជាតិដោយសន្តិវិធី ហើយបានកំណត់និយមន័យកូរ៉េខាងត្បូងថាជា «រដ្ឋអរិភាព»៕