លោកប្រធានាធិបតី Donald Trump បានប្រកាសថា ភ្នាក់ងារអនុវត្តច្បាប់អន្តោប្រវេសន៍ នឹងត្រូវបានដាក់ពង្រាយនៅទូទាំងអាកាសយានដ្ឋានធំៗរបស់សហរដ្ឋអាមេរិកចាប់ពីថ្ងៃចន្ទនេះតទៅ ជាចំណាត់ការដ៏អស្ចារ្យមួយដើម្បីបន្ធូរបន្ថយវិបត្តិសន្តិសុខបង្កឡើងដោយការជាប់គាំងនយោបាយដែលអូសបន្លាយពេលនៅទីក្រុងវ៉ាស៊ីនតោន។ លោក Trump បានបញ្ជាក់ពីផែនការដោយមន្ត្រីជាន់ខ្ពស់ព្រំដែនរបស់លោកគឺលោក Tom Homan ដែលត្រូវបានតែងតាំងឱ្យដឹកនាំកិច្ចខិតខំប្រឹងប្រែងនេះ។

ផែនការនេះធ្វើឡើងបន្ទាប់ពីភាពវឹកវរកើនឡើងជាច្រើនសប្តាហ៍នៅចំណុចត្រួតពិនិត្យសន្តិសុខនៅអាកាសយានដ្ឋាន និងមួយថ្ងៃបន្ទាប់ពីលោក Trump បានគំរាមពីចំណាត់ការនេះ លុះត្រាតែក្រុមប្រជាធិបតេយ្យ ដកថយពីការតតាំងផ្នែកមូលនិធិ។ វិបត្តិកើតចេញពីការបរាជ័យរបស់សភាក្នុងការបន្តផ្តល់មូលនិធិសម្រាប់ក្រសួងសន្តិសុខមាតុភូមិ (DHS) ជាទីភ្នាក់ងារសហព័ន្ធដែលត្រួតពិនិត្យសន្តិសុខនៅអាកាសយានដ្ឋាន។

ចាប់តាំងពីថ្ងៃទី ១៤ខែកុម្ភៈ បុគ្គលិករាប់ម៉ឺននាក់ រួមទាំងអ្នកត្រួតពិនិត្យរដ្ឋបាលសន្តិសុខដឹកជញ្ជូន (TSA) ដែលទទួលខុសត្រូវចំពោះការត្រួតពិនិត្យអ្នកដំណើរ បានបន្តធ្វើការដោយមិនទទួលបានមូលប្បទានប័ត្រប្រាក់ខែ។ យោងតាមក្រសួងសន្តិសុខមាតុភូមិ (DHS) បានឲ្យដឹងថា មានមនុស្សជាង៣៦០នាក់បានលាលែងពីតំណែង ហើយអវត្តមានដែលមិនបានគ្រោងទុកបានកើនឡើងទ្វេដង ធ្វើឱ្យអាកាសយានដ្ឋានធំៗពិបាកទប់ទល់។

«ការខាតបង់នេះ បានធ្វើឱ្យសមត្ថភាពរបស់រដ្ឋបាលសន្តិសុខដឹកជញ្ជូន (TSA) ក្នុងការបំពេញតម្រូវការអ្នកដំណើរ ថយចុះយ៉ាងខ្លាំង និងបន្សល់ទុកភាពចន្លោះប្រហោងសំខាន់ៗក្នុងការជ្រើសរើសបុគ្គលិក ដោយសារបុគ្គលិកថ្មីម្នាក់ៗត្រូវការការបណ្តុះបណ្តាលរយៈពេល ៤ទៅ៦ ខែ»។