​បាល់ទាត់៖ ខ្សែបម្រើ​ក្រុម​បិសាច​ក្រហម Manchester United, Bruno Fernandes បាន​ស៊ុត​បញ្ចូល​ទី​​ឱ្យ​ព័រទុយហ្កាល់យកឈ្នះ​ម៉ា​សេ​ដ្វា​ន់​ខាងជើង ២-០ កក់​កៅអី World Cup 2022 នៅ​កាតា​។ ​​គ្រាប់​ដំបូង​កើតឡើង​ពី​ការលេង​មួយ​-​ពីរ​ជាមួយ​មិត្ត​រួម​ក្រុម Cristiano Ronaldo ស៊ុត​បញ្ចូល​ទី​បានសំរេច​នៅ​នាទី​ទី៣២ ខណៈ​គ្រាប់​ទី​ពីរ​កើតឡើង​នៅ​វគ្គ​ទី២ នាទី​ទី៦៥ ស៊ុត​វ៉ូ​ឡេ​ពី​ការបញ្ជូន​របស់ Diogo Jota​។

​​ម៉ា​សេ​ដ្វា​ន់​ខាងជើង​ដែល​ទំលាក់​អ៊ីតាលី​ឡើងមក​ដល់​វគ្គ​នេះ មិនសូវ​មានឱកាស​ឡើយ​ក្នុងការ​ប្រកួត​នេះ​។ ​​សំរាប់​ព័រទុយហ្កាល់​នឹង​បង្ហាញខ្លួន​នៅ​បាល់ទាត់​ពិភពលោក ៦ព្រឹត្តិការណ៍​ជាប់​គ្នា ខណៈដែល​កីឡាករ​វ័យ ៣៧ឆ្នាំ​នឹង​បង្ហាញខ្លួន​ជា​លើក​ទី៥ ក៏​អាចជា​លើកចុងក្រោយ​ផងដែរ​។ ​​ចំណែកឯ​វគ្គ Play-Off ផ្តាច់ព្រ័ត្រ​មួយគូ​ទៀត​ប៉ូឡូញ​បាន​កក់​កៅអី World Cup ហើយ​ក្រោយ​យកឈ្នះ​ស៊ុយអែត ២-០​។ ​​គ្រាប់​ទី១ របស់​ប៉ូឡូញ​ធ្វើបាន​ដោយ​បាល់​ពិន័យ ១១ម៉ែត្រ​របស់ Robert Lewandowski នៅ​វគ្គ​ទី២ នាទី​ទី៤៩ និង​គ្រាប់​ទី២ ធ្វើបាន​ដោយ Piotr Zielinski នាទី​ទី៧២​។

​​ខ្សែប្រយុទ្ធ​វ័យ​ចំណាស់ ៤០ឆ្នាំ​របស់​ស៊ុយអែត​ក៏បាន​ចូល​លេង​ផងដែរ​នៅ ១០នាទីចុងក្រោយ​។ ​​ជ័យជំនះ​នេះ​បានធ្វើឱ្យ​ប៉ូឡូញ​នឹង​បង្ហាញខ្លួន​នៅ World Cup ពីរ​ព្រឹត្តិការណ៍​ជាប់​គ្នា និង​ជា​លើក​ទី៨ ក្នុង​ប្រវត្តិសាស្ត្រ​។ ​ការចាប់​ឆ្នោត​បែងចែក​ពូ​ល ៣២ក្រុម​ចុងក្រោយ​នឹងធ្វើ​ឡើង​នៅ​ថ្ងៃ​សុក្រ​នេះ​នៅ​ទីក្រុង​ដូ​ហា​ប្រទេស​កាតា​៕

​អត្ថបទ​៖​នាង សុភា​វុ​ធ