យោងតាមគេហទំព័រតាមដានជើងហោះហើរ Flightradar24 បានឱ្យដឹងថា យន្តហោះដឹកអ្នកដំណើរក្នុងតំបន់មួយគ្រឿងរបស់បណ្ដាញក្រុមហ៊ុនអាកាសចរណ៍កាណាដា Air Canada Express បានបុកគ្នាជាមួយយានយន្តមួយគ្រឿងដែលចតនៅផ្លូវរត់ បន្ទាប់ពីចុះចតនៅអាកាសយានដ្ឋាន LaGuardia ក្នុងទីក្រុងញូវយ៉ក សហរដ្ឋអាមេរិក កាលពីល្ងាចថ្ងៃអាទិត្យ (២២ មីនា) ដែលជាហេតុការណ៍មួយបណ្តាលឱ្យព្រលានយន្តហោះដ៏មមាញឹកមួយនេះត្រូវបិទទ្វារជាបណ្ដោះអាសន្ន។

របាយការណ៍និយាយថា មនុស្សមួយចំនួនបានរងរបួស។ Flightradar24 បញ្ជាក់ថា យន្តហោះប្រភេទ CRJ-900 ដែលមកពីទីក្រុងម៉ុងរ៉េអាល់ បានបុកនឹងរថយន្តនោះ ក្នុងល្បឿនប្រហែល ៣៩គីឡូម៉ែត្រក្នុងមួយម៉ោង។ យន្តហោះនេះប្រតិបត្តិការដោយក្រុមហ៊ុន Jazz Aviation ដែលជាដៃគូក្នុងតំបន់របស់ Air Canada។

សេចក្តីជូនដំណឹងពីនិយតករបានឱ្យដឹងថា រដ្ឋបាលអាកាសចរណ៍សហព័ន្ធ (FAA) របស់អាមេរិក បានបញ្ជាឱ្យផ្អាកការហោះហើរ និងចុះចតសម្រាប់យន្តហោះទាំងអស់នៅអាកាសយានដ្ឋាននោះជាបណ្ដោះអាសន្ន។ សេចក្តីជូនដំណឹងរបស់ FAA បង្ហាញថា មូលហេតុនៃការបញ្ឈប់សកម្មភាពនៅអាកាសយានដ្ឋាន គឺដោយសារមានគ្រោះអាសន្ន ហើយមានលទ្ធភាពខ្ពស់ក្នុងការអូសបន្លាយពេលបន្ថែមទៀត ដោយមិនបានបញ្ជាក់ពីព័ត៌មានលម្អិតណាមួយឡើយ។

គេហទំព័ររបស់អាកាសយានដ្ឋាន LaGuardia បានបង្ហាញថា យន្តហោះដែលត្រូវមកដល់ បានបង្វែរទិសដៅទៅកាន់ព្រលានយន្តហោះផ្សេងទៀត ឬត្រឡប់ទៅកាន់ចំណុចចាប់ផ្តើមវិញ។ វីដេអូដែលមិនទាន់មានការបញ្ជាក់នៅលើបណ្តាញសង្គម បានបង្ហាញឱ្យឃើញការខូចខាតនៅផ្នែកខាងមុខរបស់យន្តហោះមួយគ្រឿងនោះ និងផ្អៀងឡើងលើបន្តិច។ នាយកដ្ឋានពន្លត់អគ្គិភ័យញូវយ៉ក បាននិយាយក្នុងសេចក្តីថ្លែងការណ៍មួយថា ខ្លួនកំពុងឆ្លើយតបទៅនឹងរបាយការណ៍នៃឧប្បត្តិហេតុដែលពាក់ព័ន្ធនឹងយន្តហោះ និងយានជំនិះនៅលើផ្លូវរត់ នៅអាកាសយានដ្ឋាន LaGuardia ប៉ុន្តែមិនបានផ្តលម្អិតនោះទេ៕