ទំនាក់ទំនងរវាងប្រទេសអ៊ុយក្រែន និងប្រទេសជិតខាងហុងគ្រី កាន់តែធ្លាក់ចុះខ្លាំង ជុំវិញបំពង់បង្ហូរប្រេង និងផែនការរបស់សហភាពអឺរ៉ុបក្នុងការបន្ថែមប្រាក់កម្ចីដល់ទីក្រុងគីវ។ ប្រទេសហុងគ្រី ដែលទំនងជាគាំទ្ររុស្ស៊ី បាននាំចូលប្រេងរបស់រុស្ស៊ីតាមរយៈបំពង់បង្ហូរប្រេងឆ្លងកាត់ប្រទេសអ៊ុយក្រែន។ ការផ្គត់ផ្គង់ប្រេងទៅកាន់ប្រទេសហុងគ្រី បានត្រូវបានបញ្ឈប់កាលពីក្នុងខែមករា បន្ទាប់ពីការវាយប្រហាររបស់រុស្ស៊ី ដែលបានបំផ្លាញបំពង់បង្ហូរប្រេង។

ទីក្រុង Budapest បានត្អូញត្អែរអំពីវឌ្ឍនភាពយឺតយ៉ាវក្នុងការជួសជុលបំពង់បង្ហូរប្រេងនៅអ៊ុយក្រែន ដោយចោទប្រកាន់ប្រទេសនេះថាបានពន្យារពេលការងារដោយចេតនា។ នាយករដ្ឋមន្ត្រីប្រទេសហុងគ្រី លោក Viktor Orban បានរិះគន់អ៊ុយក្រែនដដែលៗថា ទីក្រុងគីវបានដាក់ប្រទេសហុងគ្រីនៅក្រោមការបិទផ្លូវប្រេង។

នៅប្រទេសហុងគ្រី បុគ្គលិកចំនួន៧នាក់របស់ធនាគាររដ្ឋអ៊ុយក្រែន ត្រូវបានឃុំខ្លួនពីបទសង្ស័យលាងលុយ កាលពីថ្ងៃទី៥ ខែមីនា ខណៈកំពុងដឹកជញ្ជូនសាច់ប្រាក់ និងដុំមាសនៅក្នុងរថយន្ត។ ក្រោយមក ពួកគេត្រូវបានបណ្តេញចេញ ប៉ុន្តែសាច់ប្រាក់ និងមាសដែលរឹបអូសបាន ពុំត្រូវបានប្រគល់ឲ្យវិញទេ។ រដ្ឋមន្ត្រីការបរទេសអ៊ុយក្រែន លោក Andrii Sybiha បានរិះគន់លោក Orban ដោយចំឈ្មោះ។ ប្រទេសអ៊ុយក្រែន ត្រូវបានគេរំពឹងថានឹងប្រឈមទៅនឹងកង្វះការផ្តល់មូលនិធិធ្ងន់ធ្ងរនៅដើមឆមាសទីមួយនៃឆ្នាំនេះ។ សហភាពអឺរ៉ុប បានសម្រេចកាលពីខែធ្នូ ឆ្នាំមុនថា នឹងផ្តល់ប្រាក់កម្ចីចំនួន ៩០ ពាន់លានអឺរ៉ូ ឬប្រហែល ១០៤ ពាន់លានដុល្លារដល់ប្រទេសអ៊ុយក្រែន។ ប្រាក់កម្ចីនេះពុំទាន់ត្រូវបានផ្តល់ឱ្យនៅឡើយទេ ដោយសារតែការជំទាស់ពីប្រទេសហុងគ្រី ដែលលើកឡើងពីការពន្យារពេលក្នុងការជួសជុលបំពង់បង្ហូរប្រេង។