នាយករដ្ឋមន្ត្រីឥណ្ឌា លោក Narendra Modi កាលពីថ្ងៃអាទិត្យ ទី២២ ខែមីនា បានដឹកនាំកិច្ចប្រជុំមួយនៅទីក្រុងញូវដែលី ដើម្បីពិនិត្យឡើងវិញនូវវិស័យថាមពលសំខាន់ៗ រួមទាំងប្រេង ប្រេងឆៅ ឧស្ម័នធម្មជាតិ ថាមពល និងជី ខណៈសង្គ្រាមរបស់សហរដ្ឋអាមេរិក និងអ៊ីស្រាអែលកំពុងកើនឡើងលើប្រទេសអ៊ីរ៉ង់ បង្កឱ្យមានការព្រួយបារម្ភអំពីការរំខានដល់ការផ្គត់ផ្គង់ថាមពល។

យោងតាមអ្នកជំនាញបានឲ្យដឹងថា ប្រទេសឥណ្ឌានាំចូលប្រេងឆៅប្រហែល៩០% ឧស្ម័ន(LPG)ជិតពាក់កណ្តាល និងប្រេងប្រហែលពាក់កណ្តាល ឆ្លងកាត់ច្រកសមុទ្រ Hormuz។ រហូតមកដល់ពេលនេះ រដ្ឋាភិបាលសហព័ន្ធបាននិយាយថា មានការផ្គត់ផ្គង់ប្រេងឆៅ និងស្តុកប្រេងឥន្ធនៈចម្រាញ់រួចគ្រប់គ្រាន់ ដើម្បីបំពេញតម្រូវការក្នុងស្រុក។ ទោះជាយ៉ាងណា ប្រទេសនាំចូលឧស្ម័ន LPG ធំបំផុតទីពីររបស់ពិភពលោកមួយនេះ កំពុងប្រឈមមុខនឹងវិបត្តិឧស្ម័នចម្អិនអាហារដ៏អាក្រក់បំផុតរបស់ខ្លួនក្នុងរយៈពេលជាច្រើនទសវត្សរ៍មកនេះ ដោយការដឹកជញ្ជូនពីច្រកសមុទ្រ Hormuz ស្ទើរតែត្រូវបានផ្អាកដោយសារតែសង្គ្រាម។

ទន្ទឹមនឹងនេះ នាវាដឹកប្រេងរបស់រុស្ស៊ី Aqua Titan ត្រូវបានគេមើលឃើញនៅសមុទ្រកាលពីថ្ងៃអាទិត្យ ទី២២ ខែមីនា ខណៈប្រព័ន្ធផ្សព្វផ្សាយក្នុងស្រុកបានរាយការណ៍ពីការទៅដល់របស់វានៅកំពង់ផែ New Mangalore ភាគខាងត្បូងប្រទេសឥណ្ឌា។

សហរដ្ឋអាមេរិកកាលពីថ្ងៃទី ១២ ខែមីនា បានចេញការលើកលែងរយៈពេល ៣០ ថ្ងៃសម្រាប់ប្រទេសនានាដើម្បីទិញប្រេង និងផលិតផលប្រេងរបស់រុស្ស៊ីដែលត្រូវបានដាក់ទណ្ឌកម្ម ខណៈបច្ចុប្បន្នជាប់គាំងនៅសមុទ្រ ដោយរដ្ឋមន្ត្រីក្រសួងរតនាគារ លោក Scott Bessent បាននិយាយថា ជាចំណតា់ការមួយដើម្បីរក្សាស្ថិរភាពទីផ្សារថាមពលសកលដែលរងផលប៉ះពាល់ដោយសារសង្គ្រាមនៅអ៊ីរ៉ង់។