យោងតាមការស្ទង់មតិចំនួនពីរដែលបានធ្វើឡើងកាលពីចុងសប្តាហ៍កន្លងទៅ បានបង្ហាញថា ប្រជាជនជប៉ុនភាគច្រើន ប្រឆាំងនឹងការបញ្ជូននាវាចម្បាំងទៅកាន់មជ្ឈិមបូព៌ា ដើម្បីឆ្លើយតបនឹងសង្គ្រាមនៅអ៊ីរ៉ង់ ស្របពេលដែលសហរដ្ឋអាមេរិក បន្តដាក់សម្ពាធលើសម្ព័ន្ធមិត្តឱ្យជួយការពារសន្តិសុខនៅច្រកសមុទ្រហ័រមូសដ៏សំខាន់។

នៅក្នុងការស្ទង់មតិរបស់កាសែត Yomiuri មានអ្នកឆ្លើយតប ៦៧% បានសម្តែងការជំទាស់ចំពោះការបញ្ជូនកងកម្លាំងស្វ័យការពាររបស់ជាតិទៅកាន់តំបន់នោះ ខណៈការស្ទង់មតិរបស់បណ្តាញព័ត៌មាន ANN បានបង្ហាញថា អត្រា ៥២% ប្រឆាំងនឹងការដាក់ពង្រាយនេះ។ ការស្ទង់មតិទាំងនេះក៏បង្ហាញផងដែរថា អាត្រាគាំទ្រចំពោះគណៈរដ្ឋមន្ត្រីរបស់នាយករដ្ឋមន្ត្រីជប៉ុន លោកស្រី Sanae Takaichi នៅតែមានកម្រិតខ្ពស់គឺក្នុងអត្រា ៧១% និង ៦៥,២% រៀងគ្នា។

នៅក្នុងជំនួបកំពូលកាលពីថ្ងៃទី១៩ ខែមីនា ជាមួយប្រធានាធិបតីអាមេរិក Donald Trump លោកស្រី Takaichi បានព្យាយាមបញ្ចៀសការប្រឈមមុខដាក់គ្នាជាមួយមេដឹកនាំអាមេរិករូបនេះ ជុំវិញបញ្ហាច្រកសមុទ្រហ័រមូស ប៉ុន្តែលោក Trump នៅតែបន្តដាក់សម្ពាធឱ្យជប៉ុន ចូលរួមតាមចំណែករបស់ខ្លួន។ ការនាំចូលប្រេងភាគច្រើនរបស់ទីក្រុងតូក្យូ គឺពឹងផ្អែកលើផ្លូវទឹកមួយនេះ ដែលបច្ចុប្បន្នកំពុងត្រូវបានបិទខ្ទប់ដោយអ៊ីរ៉ង់។

លោកស្រី Takaichi បាននិយាយថា លោកស្រីបានពន្យល់ទៅលោក Trump ថា ជប៉ុនមានឆន្ទៈក្នុងការចូលរួមចំណែកក្នុងកិច្ចប្រឹងប្រែងនេះ ប៉ុន្តែខ្លួនក៏មានដែនកំណត់ចំពោះអ្វីដែលជប៉ុនអាចធ្វើបានដែរ ដោយសារតែឧបសគ្គផ្នែកច្បាប់។ យ៉ាងណាក៏ដោយ រដ្ឋមន្ត្រីការបរទេសជប៉ុន លោក Toshimitsu Motegi បានបញ្ជាក់កាលពីចុងសប្តាហ៍មុនថា ការបញ្ជូននាវាបោសសម្អាតមីននៅច្រកហ័រមូសបន្ទាប់ពីមានបទឈប់បាញ់ អាចនឹងត្រូវយកមកពិចារណា៕