រដ្ឋាភិបាលវៀតណាម បានឱ្យដឹងថា គណបក្សកុម្មុយនីស្តដែលកំពុងកាន់អំណាចរបស់ទីក្រុងហាណូយ បានចាប់ផ្ដើមកិច្ចប្រជុំរយៈពេលមួយសប្តាហ៍របស់ខ្លួននៅថ្ងៃចន្ទ (២៣ មីនា) នេះ ដែលកំណត់ធ្វើឡើងដើម្បីសម្រេចចិត្តជ្រើសតាំងបុគ្គលិកសំខាន់ៗរបស់រដ្ឋ និងរដ្ឋាភិបាល។

កិច្ចប្រជុំពេញអង្គនេះ ត្រូវបានរំពឹងទុកយ៉ាងទូលំទូលាយថា នឹងមានការតែងតាំងមុខតំណែងថ្នាក់ដឹកនាំកំពូលៗរបស់ប្រទេសសម្រាប់រយៈពេល ៥ឆ្នាំខាងមុខ រួមមានតំណែងនាយករដ្ឋមន្ត្រី ប្រធានរដ្ឋ និងប្រធានរដ្ឋសភា។ អគ្គលេខាធិការបក្ស លោក តូ ឡឹម (To Lam) ត្រូវបានរំពឹងទុកថា នឹងទទួលបានការតែងតាំងជាប្រធានរដ្ឋ ដែលមានន័យថា លោកនឹងកាន់តំណែងកំពូលពីរក្នុងពេលតែមួយ។

យោងតាមសេចក្តីថ្លែងការណ៍របស់រដ្ឋាភិបាល លោក តូ ឡឹម បាននិយាយក្នុងសុន្ទរកថាបើកកិច្ចប្រជុំថា៖ «កិច្ចប្រជុំពេញអង្គនេះនឹងពិនិត្យឡើងវិញនូវបញ្ហាបុគ្គលិកសម្រាប់មុខតំណែងដឹកនាំក្នុងស្ថាប័នរដ្ឋ សម្រាប់អាណត្តិ ២០២៦-២០៣១»។

គេមិនទាន់ច្បាស់ទេថា តើបក្សនឹងប្រកាសឈ្មោះបេក្ខជនដែលត្រូវបានជ្រើសតាំងនៅត្រឹមចុងបញ្ចប់នៃកិច្ចប្រជុំនៅថ្ងៃសុក្រសប្ដាហ៍នេះឬយ៉ាងណា។ រដ្ឋសភានឹងត្រូវបោះឆ្នោតផ្តល់សេចក្តីទុកចិត្តលើបេក្ខជនទាំងនោះ នៅក្នុងសម័យប្រជុំពេញអង្គដែលនឹងចាប់ផ្តើមនៅថ្ងៃទី៦ ខែមេសា។

សេចក្តីថ្លែងការណ៍បន្ថែមថា យុទ្ធនាការប្រឆាំងអំពើពុករលួយរបស់បក្ស និងផែនការអភិវឌ្ឍន៍សេដ្ឋកិច្ចសង្គមរបស់វៀតណាមសម្រាប់រយៈពេលនៃឆ្នាំ២០២៦-២០៣១ ក៏នឹងត្រូវលើកយកមកពិភាក្សាក្នុងកិច្ចប្រជុំនេះផងដែរ។ វៀតណាមកំណត់គោលដៅកំណើនសេដ្ឋកិច្ចឱ្យបានលើសពី ១០% ក្នុងមួយឆ្នាំ ក្នុងអំឡុងឆ្នាំ២០២៦-២០៣០ ហើយលោក តូ ឡឹម បានបញ្ជាក់ថា ភារកិច្ចបន្ទាន់សម្រាប់ប្រទេសជាតិ គឺការដោះស្រាយជាមួយនឹងផលប៉ះពាល់នៃសង្គ្រាម ជម្លោះ និងលទ្ធភាពនៃវិបត្តិសេដ្ឋកិច្ចសកល៕