ទីភ្នាក់ងារអាកាសធាតុរបស់អង្គការសហប្រជាជាតិ បាននិយាយនៅថ្ងៃចន្ទ (២៣ មីនា) នេះថា រយៈពេលមួយទសវត្សរ៍រវាងឆ្នាំ២០១៥ និងឆ្នាំ២០២៥ គឺជាឆ្នាំដែលមានអាកាសធាតុក្តៅបំផុត ចាប់តាំងពីកំណត់ត្រាបានចាប់ផ្តើម ដោយឆ្នាំ២០២៥ កន្លងទៅនេះ អាចជាប់ចំណាត់ថ្នាក់លេខពីរ ឬលេខបីជារួម ក្នុងចំណោមឆ្នាំដែលមានអាកាសធាតុក្ដៅបំផុត។

របាយការណ៍របស់អង្គការឧតុនិយមពិភពលោក WMO បាននិយាយថា ពីឆ្នាំ២០១៥ ដល់ឆ្នាំ២០២៥ គឺជាឆ្នាំក្តៅបំផុតទាំង១១ ចាប់តាំងពីកំណត់ត្រាបានចាប់ផ្តើមនៅឆ្នាំ១៨៥០មក។ របាយការណ៍ស្ថានភាពអាកាសធាតុពិភពលោករបស់ WMO បាននិយាយថា ឆ្នាំ២០២៥ គឺជាឆ្នាំដែលក្តៅបំផុតទីពីរ ឬទីបីក្នុងកំណត់ត្រា ដែលមានសីតុណ្ហភាពជាមធ្យមប្រហែល ១,៤៣ អង្សាសេលើសពីមធ្យមភាគមុនសម័យឧស្សាហកម្ម។

លោក Antonio Guterres អគ្គលេខាធិការអង្គការសហប្រជាជាតិ បាននិយាយថា «ស្ថានភាពអាកាសធាតុពិភពលោកកំពុងស្ថិតក្នុងគ្រាអាសន្ន។ ភពផែនដីកំពុងត្រូវបានរុញច្រានឱ្យហួសពីដែនកំណត់របស់ខ្លួន ខណៈសូចនាករអាកាសធាតុសំខាន់ៗទាំងអស់ កំពុងប្រែពន្លឺភ្លឹបភ្លែតៗទៅជាពណ៌ក្រហមយ៉ាងគ្រោះថ្នាក់»។

របាយការណ៍នេះក៏បានបញ្ជាក់ថា ឆ្នាំ២០២៤ បានជាប់លេខរៀងទីមួយក្លាយជាឆ្នាំដែលមានអាកាសធាតុក្តៅបំផុត ដោយមានសីតុណ្ហភាពប្រហែល ១,៥៥ អង្សាសេ លើសពីមធ្យមភាគមុនឧស្សាហកម្ម។ អត្រានេះបានឆ្លងហួសបន្ទាត់ក្រហម ដែលរដ្ឋាភិបាលនានាបានសន្យាក្រោមកិច្ចព្រមព្រៀងទីក្រុងប៉ារីសឆ្នាំ២០១៥ ថានឹងព្យាយាមបញ្ចៀសការឡើងកម្ដៅផែនដីលើសពី ១,៥ អង្សាសេ៕